Չինաստանն այսօր հաջողությամբ արձակել է «Տյանչժոու-9» բեռնատար տիեզերանավը՝ ուղարկելով այն դեպի պետության ուղեծրային կայան։ Անավը կհասցնի սնունդ, տեխնիկա և այլ անհրաժեշտ պարագաներ՝ նախատեսված տիեզերագնացների համար։

Տիեզերանավի արձակումը կայացել է Պեկինի ժամանակով 05:34-ին՝ CZ-7 կրող հրթիռի միջոցով։ Մեկնարկը տեղի է ունեցել Վենչանգի տիեզերակայանից, որը գտնվում է Հայնան նահանգի արևելյան ափին։

Սիչուան նահանգի տիեզերական արձակումների կենտրոնի ներկայացուցիչ Գո Չժունլայը հաստատել է, որ արձակումն անցել է հաջողությամբ։ «Տյանչժոու-9-ը ճշգրիտ մուտք է գործել նախատեսված ուղեծիր, արևային մարտկոցները բացվել են, և անավն արդեն աշխատում է նորմալ ռեժիմում»,– հայտարարել է նա։

Ուղեծրային կայանում ներկայումս գտնվում են «Շենչժոու-20» առաքելության երեք տիեզերագնացներ՝ Չեն Դունը (հրամանատար), Չեն Չժունժույը և Վան Ցզեյը։ Նրանք ուղեծիր են հասել ապրիլի 25-ին։ «Տյանչժոու-9»-ը կայան է հասցրել մոտ 6,5 տոննա բեռ, որը ներառում է նոր տիեզերական հագուստ, մկանային մարզման սարքավորումներ, գիտական փորձերի համար անհրաժեշտ տեխնիկա, այդ թվում՝ բժշկական հետազոտությունների համար նախատեսված սարքեր։

CZ-7 հրթիռը երկաստիճան կրող միջոց է, որն աշխատում է հեղուկ վառելիքով։ Այն ունի 4.2 մետր տրամագծով գլխամաս, երկարությունը հասնում է 53 մետրի և կարող է տեղափոխել մինչև 14 տոննա բեռ Երկրի ցածր ուղեծիր (կամ 5.5 տոննա գեոստացիոնար ուղեծիր)։ Սա հրթիռի 20-րդ մեկնարկն է, իսկ 2025 թվականին՝ երրորդը։

Չինաստանի ուղեծրային կայանը գտնվում է Երկրից մոտ 400 կմ բարձրության վրա և կաշխատի առնվազն 10 տարի։ Այն նախագծված է երեք մշտական անդամ ունեցող անձնակազմի համար (ռոտացիայի ժամանակ՝ մինչև վեց տիեզերագնաց)։ T-աձև կառուցվածքով կայանը, որը շուտով կընդլայնվի խաչաձև ձևաչափով, ունի երեք միացման հանգույց և տիեզերական «նավահանգիստ»։ Կայանի ընդհանուր զանգվածը կազմում է 66 տոննա, իսկ ներքին ծավալը՝ 110 խորանարդ մետր։ 2022 թվականից կայանն արդեն գործում է կանոնավոր ռեժիմով և մասնակցում է միջազգային համատեղ ծրագրերին։