Նիգերիայի նախկին նախագահ Մուհամմադու Բուհարին մահացել է 82 տարեկան հասակում։ Նրա մահվան մասին տեղեկացրել է BBC News-ը։ Բուհարին մահացել է Լոնդոնի կլինիկայում՝ երկարատիվ հիվանդությունից հետո։

Բուհարին եղել է ռազմական կառավարիչ, իսկ հետագայում՝ դեմոկրատ նախագահ։ Նա իշխանության է եկել 2015 թվականի նախագահական ընտրություններում՝ դառնալով առաջին ընդդիմադիր թեկնածուն, որը հաղթել է գործող նախագահին։ Բուհարին խոստացել էր երկիրն առաջ մղել խոր բարեփոխումներով, ներառյալ կոռուպցիայի դեմ պայքարը և երիտասարդների համար աշխատատեղերի ստեղծումը։

Երեք անհաջող փորձերից հետո նա 2015 թվականին վերջապես հասավ իր նպատակին և ղեկավարեց Նիգերիան։ 2019 թվականին նա վերընտրվեց երկրորդ ժամկետով՝ ստանալով ժողովրդի վստահությունը։

Նրա ռազմական վարպետությունը և կարգապահական կոշտ մոտեցումը նիգերիացիների մի մասի համար հույս էին ներշնչում։ Նրանք կարծում էին, որ Բուհարին կկարողանա դիմակայել երկրի հյուսիսում ակտիվ գործող իսլամիստական խմբավորումներին։

Սակայն նրա նախագահության տարիներին Նիգերիան բախվեց լուրջ մարտահրավերների։ Նավթի գների կտրուկ անկումը հանգեցրեց տնտեսական ճգնաժամի, ինչը բացասաբար անդրադարձավ երկրի զարգացման վրա։ Բացի այդ, քննադատները նշում էին անվտանգության ոլորտում թույլ աշխատանքը։

Ընտրարշավի ժամանակ Բուհարին խոստացել էր վերջ դնել «Բոկո Հարամ» զինյալների գործողություններին։ Սակայն խմբավորումը մինչ օրս շարունակում է ահաբեկչական հարձակումներ կատարել, և նրա մի ճյուղը կապված է «Իսլամական պետություն» ահաբեկչական կազմակերպության հետ։