**4-ամյա երեխայի անհետացում Գետազատում. ծավալված են լայնածավալ որոնումներ**

Այսօր՝ հուլիսի 13-ին, Արարատի մարզի Գետազատ գյուղի «Բարդիների պուրակ» հանգստյան գոտում 4 տարեկան աղջիկ է անհետացել։ Ոստիկանությունը միջադեպի մասին տեղեկացել է ժամը 13:00-ին։

Տեղի ունեցածի վայր են ժամանել Արարատի մարզի ոստիկանության, փրկարարների և շտապ օգնության մեծ թվով աշխատակիցներ։ Որոնողական աշխատանքներին մասնակցում են նաև տեղացիներն ու հանգստանողները։

Մայրը՝ Արմավիրի մարզից ժամանած քաղաքացին, ֆոտոլրագրողին հայտնել է, որ երեխայից աչքը հեռացրել է ընդամենը 5 րոպե։ Փրկարարները ստուգել են հանգստյան գոտու արհեստական լճակը, սակայն երեխային չեն գտել։ Ներկայումս ջուրը իջեցված է։

Որոնումներն ընթանում են նաև հարակից Ստալինյան ջրանցքի հատվածում, որտեղ ջրի հոսքը դադարեցվել է։ Փրկարարները օգտագործում են դրոններ և հատուկ սարքավորումներ։

ՀՀ ՆԳՆ փրկարարական ծառայության ղեկավար Կամո Ցուցուլյանը Երևանից ուղարկել է լրացուցիչ ուժեր, այդ թվում՝ ջրասուզակների, կինոլոգների և հատուկ ստորաբաժանումների։ Որոնումները համակարգում են փրկարար ծառայության տեղակալներ Տիգրան Պետրոսյանն ու Արսեն Մկրտչյանը։

Արտաշատի տեղական իշխանությունները նույնպես միացել են աշխատանքներին՝ քաղաքապետ Կառլեն Մկրտչյանի գլխավորությամբ։

**Ծանուցում**
Որևէ մեկին մեղադրանք կարող է առաջադրվել միայն դատարանի վերջնական դատավճռից հետո՝ համաձայն ՀՀ քրեական օրենսգրքի։