Գազայի բնակիչները հրաժարվել են ԱՄՆ նախագահ Դոնալդ Թրամփի և Իսրայելի վարչապետ Բենիամին Նեթանյահուի առաջարկից, որը նախատեսում էր պաղեստինցիներին վերաբնակեցնել հարևան երկրներում։ Ռոյթերսի հաղորդմամբ՝ տարածաշրջանի բնակիչները դա համարում են անընդունելի։

«Սա մեր հողն է։ Ո՞ւմ ենք թողնելու այն, ո՞ւր պետք է գնանք», – ասել է 45-ամյա Մանսուր Աբու ալ-Խայրը՝ նշելով պատերազմից ավերված տարածքի վիճակը։

Այս շաբաթ Թրամփն ու Նեթանյահուն հաստատել են, որ քննարկում են վերաբնակեցման ծրագիրը՝ խոսելով հարևան երկրների հետ համագործակցության մասին։ Իսրայելի վարչապետը նշել է, որ պաղեստինցիները պետք է «ընտրություն ունենան»՝ մնալ Գազայում կամ հեռանալ։

Միևնույն ժամանակ, Հորդանանն ու Եգիպտոսն արդեն մերժել են այս գաղափարը։ ՄԱԿ-ի մարդու իրավունքների մասնագետ Ռավինա Շամդասանին նշել է, որ ծրագիրը կարող է հանգեցնել բռնի տեղահանման։

Պաղեստինցիների համար տեղահանության հարցը խոցելի թեմա է, ինչը կապված է 1948 թվականի Նակբայի հետ, երբ հարյուր հազարավոր մարդիկ կորցրել էին իրենց տները։ «Մենք դեմ չենք ազատ տեղաշարժին, բայց կհակադրվենք բռնի միջոցներին», – ասել է 27-ամյա Սաեդը Գազայից։

Տվյալներով՝ Գազայի բնակիչների գրեթե կեսը կցանկանար լքել շրջանը՝ պատերազմի և մարդասիրական ճգնաժամի պատճառով։ Սակայն շատերը պնդում են, որ չեն պատրաստվում հեռանալ ուժի կիրառմամբ։ «Մեր զոհված երեխաներն այստեղ են թաղված։ Մենք այստեղից չենք հեռանա», – հայտարարել է Աբու Սամիր էլ-Ֆաքաավին։

Հիշատակենք, որ 2023 թվականի հոկտեմբերից սկսված պատերազմի հետևանքով Գազայում զոհվել է ավելի քան 57 հազար պաղեստինցի՝ տեղական իշխանությունների տվյալներով։