Թայվանն այսօր սկսում է իր ամենամեծ ամենամյա Հան Կուանգ ռազմական զորավարժությունները՝ ցույց տալով նախագահ Լայ Չինգ-տեի վճռականությունը ամրապնդել կղզու պաշտպանությունը։

Զորավարժությունները կտևեն 10 օր՝ սովորականից երկու անգամ ավելի երկար։ Ըստ պաշտոնական տվյալների, մասնակցելու է 20,000-ից ավելի պահեստազորային, ինչը ռեկորդային թիվ է։ Առաջին անգամ քաղաքացիական անձինք ներգրավվելու են այսպիսի մասշտաբով. խոշոր սուպերմարկետների նկուղները վերածվել են ապաստարանների, իսկ տեղական իշխանությունները կստուգեն իրենց պատրաստականությունը՝ 23 միլիոն բնակչությանը ճգնաժամի պայմաններում հիմնական ծառայություններ ապահովելու համար։

«Այս տարվա Հան Կուանգ զորավարժությունների նպատակն է ուժեղացնել Թայվանի երկարաժամկետ պաշտպանական կարողությունները՝ ներառյալ և՛ բանակը, և՛ քաղաքացիական հասարակությունը», — հայտարարել է Չե Չունգը՝ Ազգային պաշտպանության և անվտանգության ուսումնասիրությունների ինստիտուտի փորձագետ։ Նրա խոսքով՝ զորավարժությունների սցենարները մոտենում են Չինաստանի հնարավոր հարձակման իրական պայմաններին։

HIMARS-ների և անօդաչու սարքերի փորձարկում

Այս տարվա զորավարժություններում կօգտագործվեն ավելի շատ ամերիկյան զինատեսակներ, այդ թվում՝ HIMARS բազմափող հրթիռային համակարգը, որը Թայվանը առաջին անգամ փորձարկել է մայիսին։ Հատուկ ուշադրություն կդարձվի անօդաչու թռչող սարքերի կիրառմանը և չինական անօդաչուների դեմ պայքարին։

«Զինվորականները փորձարկում են անօդաչու սարքերի օգտագործման նոր մարտավարություններ։ Այս զորավարժությունները կօգնեն կատարելագործել այդ մեթոդները», — նշել է Չե Չունգը։

Ծրագրի համաձայն՝ այս տարի առավելագույն ուշադրություն կդարձվի քաղաքային մարտավարության վարժեցմանը, ինչը կապված է Չինաստանի ռազմածովային և օդային ուժերի աճող սպառնալիքի հետ։