Ռուսաստանի Պետական դուման առաջին ընթերցմամբ հաստատել է քաղաքացիությունից զրկելու նոր հիմքեր սահմանող օրենսդրական նախաձեռնությունը։ Այս մասին հաղորդել է ՌԴ Պետդումայի նախագահ Վյաչեսլավ Վոլոդինը։

Ներկայումս Ռուսաստանի քաղաքացիությունը չեղյալ հայտարարելու գործընթացը կարող է սկսվել միայն ՌԴ Քրեական օրենսգրքի 64 հոդվածներով նախատեսված ծանր հանցագործությունների դեպքում։ Այս կետերն ընդգրկում են՝

• ավազակությունը,
• թմրանյութերի ու զինատեսակների ապօրինի շրջանառությունը,
• հանցավոր խմբավորումներ կազմակերպելը,
• լրտեսությունը,
• պետական դավաճանությունը,
• պետական գաղտնիքների բացահայտումը։

Վոլոդինի պարզաբանմամբ՝ նոր օրինագիծը առաջարկում է վերը նշված ցուցակն ընդլայնել 8 լրացուցիչ կետերով։ Դրանք են՝

• սեռական բռնություն կիրառելը,
• ահաբեկչության հրապարակային հորդորումը կամ դրա արդարացումը,
• թշնամական պետություններին Ռուսաստանի անվտանգության դեմ գործողություններում օգնելը,
• նացիստական խորհրդանիշների քարոզչությունը,
• օտարերկրյա կազմակերպությունների հետ գաղտնի համագործակցություն,
• միջազգային կազմակերպությունների որոշումների իրականացմանն աջակցություն,
• պետության դեմ ուղղված հրապարակային կոչեր,
• ռազմավարական տեղեկատվական համակարգերի վրա ազդեցություն գործադրելը։

«Օրինագծի վերջնական քննարկումը նախատեսվում է ավարտել մինչև հուլիս ամսվա վերջ՝ առաջնահերթության կարգով»,-նշել է Պետդումայի ղեկավարը։