Մեխիկոյում սկսված զանգվածային բողոքի ցույցերը կապված են բնակարանային գների կտրուկ աճի և կենտրոնական թաղամասերից տեղի բնակիչների հարկադրական տեղահանման հետ։ AP գործակալության հաղորդմամբ՝ միջոցառմանը մասնակցել են հարյուրավոր քաղաքացիներ, և թեև ցույցը հիմնականում խաղաղ ընթացք է ունեցել, վերջում որոշ ցուցարարներ փշրել են խանութների ցուցափեղկեր և կատարել թալան։

Ցուցարարների կրած պաստառներին գրված էին «Գրինգոներ, դադարեցրեք մեր տների գողությունը» և «Բնակարան տեղացիների համար» կարգախոսներ։ Ակցիան ուղղված էր Մեխիկոյի նախկին քաղաքապետ (ներկայիս նախագահ) Կլաուդիա Շեյնբաումի քաղաքականության դեմ։ 2022-ին նա համաձայնագիր էր ստորագրել Airbnb-ի և ՅՈՒՆԵՍԿՕ-ի հետ՝ ԱՄՆ-ից և Եվրոպայից «թվային քոչվորներին» ու զբոսաշրջիկներին գրավելու նպատակով։

Այդ ժամանակից ի վեր Ռոմա և Կոնդեսա թաղամասերը վերածվել են «օտարերկրացիների օազիսների», որտեղ կարճաժամկետ վարձակալության տները գերակշռում են, իսկ փողոցներում իսպաներենն ավելի քիչ է հնչում։ Բնակարանների և վարձավճարների արժեքն այնքան է աճել, որ երիտասարդներն ու աշխատավորները հարկադրված են լքել քաղաքը։

Նախագահ Շեյնբաումը դատապարտել է ցույցերը՝ դրանք անվանելով «քսենոֆոբ» օտարերկրացիների դեմ ուղղված կարգախոսների պատճառով։ Սակայն Հակագենտրիֆիկացիոն ճակատի ներկայացուցիչները մերժել են մեղադրանքները՝ նշելով, որ խնդրի արմատներն են կառավարության անգործությունն ու վարձակալության շուկայի վերահսկողության բացակայությունը։

Փորձագետները նշում են, որ բողոքներն առաջացել են ոչ միայն օտարերկրացիների ներգրավվածության, այլև բնակարանային քաղաքականության տասնամյակներ տևող ձախողումների պատճառով։ Inside Airbnb-ի տվյալներով՝ Մեխիկոյում գրանցված է ավելի քան 26,000 կարճաժամկետ վարձու տուն՝ համադրելի Նյու Յորքի և Բարսելոնայի ցուցանիշներին, որտեղ նույնպես գրանցվել են զանգվածային զբոսաշրջության դեմ բողոքներ։

Քաղաքի վարչակազմը ներկայումս վարձակալության համար նոր կանոններ է մտցրել՝ սահմանափակելով Airbnb-ի տների վարձավճարը տարեկան 180 օրով։ Սակայն հետազոտողները նշել են, որ այդ կանոնների փաստացի կիրառումը կհնարավոր դառնա ոչ վաղը, քան 2026 թվականին։

«Սա բացարձակապես անբավարար է»,— հայտարարել է սոցիոլոգ Անտոնիո Ացելանը։ «Խնդրի լուծումը պահանջում է շուկայի համակարգված կարգավորում, այլ ոչ թե միայն Airbnb-ի գործունեության սահմանափակում»։