Այսօր՝ հուլիսի 8-ին, Զվարթնոց միջազգային օդանավակայանում պաշտոնապես դիմավորեցին «Jazeera Airways» ավիաընկերության առաջին չվերթը Քուվեյթից։ Միջոցառմանը ներկա էին «Արմենիա» Միջազգային օդանավակայաններ» ՓԲԸ տնօրեն Մարսելո Վենդեն, գլխավոր մենեջեր Սերգեյ Ավետիսյանը, «Jazeera Airways»-ի գլխավոր գործադիր տնօրեն Բարաթհան Պասուպատին, Քուվեյթում Հայաստանի դեսպան Արսեն Առաքելյանը, Հայաստանում Քուվեյթի դեսպան Մուհամմեդ Ալօրայֆանը և այլ պաշտոնյաներ։

«Արմենիա» Միջազգային օդանավակայաններ» ՓԲԸ տնօրեն Մարսելո Վենդեն շեշտեց. «Մեծ ուրախությամբ ենք նշում Երևանի և Քուվեյթի միջև ուղիղ հաղորդակցության սկիզբը։ Այս քայլը կարևոր է երկու երկրների միջև տնտեսական և մշակութային կապերի զարգացման համար, ինչպես նաև կնպաստի զբոսաշրջության աճին»։

«Jazeera Airways»-ը Քուվեյթի խոշորագույն բյուջետային ավիաընկերությունն է, որը սպասարկում է ավելի քան 60 ուղղություն։ Նրա նավատորմը ներառում է 24 օդանավ, այդ թվում՝ 11 Airbus A320 neo, որոնք հայտնի են իրենց բարձր արդյունավետությամբ։

Ավիաընկերության գլխավոր գործադիր տնօրեն Բարաթհան Պասուպատին ասել է. «Մենք հպարտ ենք, որ առաջարկում ենք միակ ուղիղ չվերթերը Քուվեյթի և Երևանի միջև։ Հայաստանը յուրահատուկ ուղղություն է՝ հարուստ պատմությամբ, բնական գեղեցկությամբ և հյուրընկալությամբ։ Քուվեյթի քաղաքացիների համար Հայաստան այժմ ավելի մատչելի է՝ շնորհիվ վիզայի ճշտված ռեժիմի»։

Քուվեյթ-Երևան-Քուվեյթ չվերթերը կկատարվեն շաբաթական երեք անգամ՝ երեքշաբթի, հինգշաբթի և շաբաթ օրերին։ Այս նոր երթուղին կհեշտացնի գործարար և զբոսաշրջային կապերը երկու երկրների միջև։

Մաղթում ենք անվտանգ թռիչքներ և հաջողություն նոր ուղղությամբ։