Իսրայելի վարչապետ Բենիամին Նեթանյահուն հայտարարել է, որ մտադիր է խաղաղություն հաստատել պաղեստինցիների հետ, սակայն անկախ պաղեստինյան պետության ստեղծումը դիտարկում է որպես Իսրայելի անվտանգությանը սպառնալիք։ Նա այս մտահոգությունն արտահայտել է Սպիտակ տանը ԱՄՆ նախագահ Դոնալդ Թրամփի հետ հանդիպման ժամանակ։

Լրագրողների հետ զրույցում Նեթանյահուն հիշատակել է Համասի 2023 թվականի հոկտեմբերի 7-ի հարձակումը՝ ընդգծելով, որ այս իրադարձությունը ցույց է տալիս անկախ պաղեստինյան պետության հնարավոր վտանգները։

«Պաղեստինցիները պետք է կարողանան ինքնակառավարվել, բայց նրանք չպետք է ունենան մեզ սպառնալու իշխանություն: Անվտանգության հսկողությունը պետք է մնա Իսրայելի ձեռքում», — հայտարարել է Նեթանյահուն:

Թրամփին հարցրել են, թե արդյոք հնարավոր է «երկու պետություն երկու ժողովուրդների համար» սկզբունքի իրականացումը, ինչին նա պատասխանել է. «Չգիտեմ»՝ խոսքը հանձնելով Նեթանյահուին:

Իսրայելի Վարչապետը շարունակել է. «Հոկտեմբերի 7-ից հետո շատերը նշել են, որ Ղազայում գոյություն ուներ Համասի կողմից կառավարվող պետական կառույց, և դրա արդյունքում տեղի ունեցան սարսափելի դեպքեր։ Մենք չենք կարող նույն սխալը կրկնել»:

Նեթանյահուն նաև արտահայտել է պատրաստակամություն աշխատելու այն պաղեստինցիների հետ, ովքեր չեն աջակցում բռնությանը։ «Մենք խաղաղություն կհաստատենք այն պաղեստինցիների հետ, ովքեր չեն ցանկանում ոչնչացնել Իսրայելը։ Սակայն անվտանգության վերահսկողությունը կմնա մեր ձեռքում», — ասել է նա:

Պաղեստինցիները տասնամյակներ է, ինչ ձգտում են ստեղծել անկախ պետություն Արևմտյան ափում, Ղազայում և Արևելյան Երուսաղեմում՝ ԱՄՆ միջնորդությամբ։ Իսրայելը մեղադրվում է բնակավայրերի ընդլայնման և Ղազայի ենթակառուցվածքների ոչնչացման մեջ, ինչը, ըստ քննադատների, խաթարում է պաղեստինյան պետականության հեռանկարը:

Հիշեցնենք, որ 2023 թվականի հոկտեմբերի 7-ին Համասի հարձակումների հետևանքով զոհվել է մոտ 1200 մարդ, իսկ 251-ը գերեվարվել է: Ի պատասխան՝ Իսրայելի ռազմական գործողությունների արդյունքում, ըստ Գազայի առողջապահության նախարարության, զոհվել է ավելի քան 57,000 մարդ։

Այս պայմաններում Թրամփը Նեթանյահուի համար ընթրիք է կազմակերպել, իսկ Կատարում անուղղակի բանակցություններ են շարունակվում՝ նպատակ ունենալով հրադադար և պատանդների ազատում ապահովել։