**Նոր Նորքի բնակիչները բողոքում են «Վեոլիա ջրի» դեմ. կոչ են անում պետականացնել ընկերությունը**

«Վեոլիա ջուր» ընկերությունը երկար տարիներ բացասական համբավ ունի Երևանցիների շրջանում։ Այժմ շատերը կոչ են անում կառավարությանը՝ ընկերությունը պետականացնելու ուղղությամբ քայլեր ձեռնարկել, հույս ունենալով, որ պետական հսկողության ներքո ջրամատակարարումն ավելի արդյունավետ կդառնա։

Հուլիսի 7-ին Երևանի Նոր Նորք վարչական շրջանի բնակիչները բողոքեցին քաղաքապետարանի, թաղամասի ղեկավարության և «Վեոլիա ջրի» դեմ՝ նշելով, որ ավելի քան 2 տարի շարունակ թաղամասի մի մասը գտնվում է հակասանիտարական վիճակում, ինչը առողջության համար լուրջ վտանգ է ներկայացնում։

Բնակիչները լրագրողին հայտնել են.
«Ապրում ենք 21-րդ դարում, բայց մեր վիճակն ավելի վատ է, քան քարե դարում։ Երևանի քաղաքապետարանը, Նոր Նորքի վարչությունը և «Վեոլիա ջուր» ընկերությունը, որոնք մեծ բյուջեներ ունեն, անտարբերությամբ են վերաբերվում հազարավոր մարդկանց խնդրին։ Նրանք պարգևավճարներ են ստանում մեր հարկերից, բայց չեն ցանկանում օգնել»։

Խնդրի կենտրոնում Երևանի մանկապարտեզի մոտ գտնվող խողովակների խափանումն է, որի պատճառով կեղտաջուրը 2 տարի շարունակ հոսում է բակերով, բազմաբնակարանային շենքերի մոտով, բժշկական կենտրոնի և սննդի կետերի հարակից տարածքներով։ Բնակիչները շարունակաբար շնչում են գարշահոտություն և վախենում վարակիչ հիվանդությունների տարածումից։

«Վեոլիա ջուր» ընկերությունը չի կատարում իր պարտավորությունները, իսկ նրա աշխատակիցները հաճախ անտարբեր են բնակիչների բողոքներին։ Նախկինում գոնե պատասխանում էին զանգերին, իսկ այժմ նույնիսկ դա չեն անում։

Քաղաքացիները կոչ են անում Երևանի քաղաքապետ Տիգրան Ավինյանին խիստ միջոցներ ձեռնարկել՝ «Վեոլիա ջրին» ստիպելու խնդիրը լուծել։ Եթե ընկերությունը չվերանորոգի հին խողովակները և չվերացնի աղտոտվածությունը, դա կնշանակի, որ քաղաքապետարանը նույնպես համաձայն է նման վիճակի հետ։

Բնակիչները նաև հիշեցնում են, որ մոտենում են ընտրությունները, և նրանց աջակցությունը կախված կլինի տեղական իշխանությունների՝ այս խնդիրը լուծելու ցանկությունից։

**Ծանուցում.**
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։