Հայաստանի և Չինաստանի միջև առևտրատնտեսական համագործակցությունն աճում է՝ նախորդ տարվա համեմատությունով երկկողմ առևտրի ծավալն ավելացել է 700 միլիոն դոլարով։ Այս մասին Հայաստանի արտաքին գործերի նախարար Արարատ Միրզոյանը հայտարարել է Չինաստանի կենտրոնական հեռուստատեսությանը (CGTN) տված հարցազրույցում։

«Մենք նաև մեկնարկել ենք Երևան-Ուրումչի ուղիղ չվերթը, ինչը նպաստում է գործարար կապերի ընդլայնմանը։ Զարգանում են նաև մշակութային փոխանակությունները, քաղաքական երկխոդությունը և ժողովուրդների մերձեցումը։ Այնուամենայնիվ, սա դեռևս մեր հարաբերությունների ամբողջ ներուժը չէ։ Նախարար Վան Յիի հետ քննարկել ենք ռազմավարական համագործակցությունը, համաշխարհային հարցերին մեր նման մոտեցումները և միջազգային կազմակերպություններում փոխգործակցությունը։ Կարծում եմ, որ սա նոր փուլի սկիզբ է, և մոտ ապագայում ակնկալում ենք նոր ձեռքբերումներ»,― նշել է Միրզոյանը։

Իրանի և Իսրայելի վերջին բախման կապակցությամբ նախարարը ընդգծել է. «Որպես Իրանի հարևան՝ Հայաստանը դատապարտել է Իրանի դեմ հարձակումը՝ ընդգծելով միակողմանի ուժային գործողությունների անընդունելիությունը։ Մեր դիրքորոշումը համահունչ էր Շանհայի կազմակերպության հետագա հայտարարություններին, ինչը պայմանավորված է ինչպես բարիդրացիական կապերով, այնպես էլ տարածաշրջանում միջուկային անվտանգության մտահոգություններով։ Որպես սահմանակից պետություն՝ մենք ողջունում ենք հրադադարի հաստատումը և կարծում, որ հակամարտությունները պետք է լուծվեն բանակցությունների միջոցով»:

Նա հիշատակել է նաև Հայաստանի խաղաղակիր ծրագիրը. «Վերջին տարիներին տարածաշրջանում պատերազմի ականատես եղած Հայաստանը պաշտպանում է խաղաղ լուծումները։ Մեր և Ադրբեջանի միջև խաղաղության համաձայնագիրը պատրաստ է ստորագրման, և մենք աշխատում ենք նաև Թուրքիայի հետ հարաբերությունները կարգավորելու ուղղությամբ։ Մենք գնահատում ենք Չինաստանի աջակցությունը այս գործընթացում»:

Քննարկելով միջազգային իրավունքի խնդիրները՝ Միրզոյանն ավելացրել է. «Տարածքային ամբողջականության խախտումն ու կանոնների թուլացումը վտանգ են ներկայացնում ոչ միայն Հայաստանի, այլև ամբողջ մարդկության համար։ Մենք կիսում ենք Չինաստանի տեսակետը բազմաբևեռ համակարգի ամրապնդման և միջազգային իրավունքի հարգանքի վերաբերյալ»: