Իսրայելի վարչապետ Բենիամին Նեթանյահուն հայտարարել է, որ իր՝ ԱՄՆ նախագահ Դոնալդ Թրամփի հետ բանակցությունները կօգնեն առաջ անցնել պատանդների ազատ արձակման և Ղազայում հրադադարի վերաբերյալ համաձայնագրի ձեռքբերման գործում։ Նա այս միտքը արտահայտել է Վաշինգտոն մեկնելուց առաջ։

Նեթանյահուն նշել է, որ Դոհայում հրադադարի շուրջ բանակցությունները վերսկսած իսրայելյան պատվիրակությունը ստացել է հստակ հրահանգներ՝ պայմանավորվել միայն Իսրայելի համար ընդունելի պայմաններով։

«Կարծում եմ, որ նախագահ Թրամփի հետ քննարկումները կհասցնեն մեզ այդ նպատակին», — ընդգծել է նա՝ շեշտելով, որ նպատակն է ապահովել բոլոր պատանդների վերադարձը և վերացնել Համասի հասցրած սպառնալիքը։

Սա Նեթանյահուի երրորդ այցն է Սպիտակ տուն՝ Թրամփի նախագահ դառնալուց հետո։ Ինքը՝ Թրամփը, նշել է, որ շատ հավանական է, որ այս շաբաթ կստորագրվի համաձայնագիր Համասի հետ, որը կհանգեցնի «համեմատաբար մեծ թվով» պատանդների ազատ արձակմանը։

Նեթանյահուն բախվում է երկրի ներսում ճնշման, քանի որ ոչ բոլոր կուսակցություններն են աջակցում Ղազայում հրադադարի գաղափարին։ Մինչդեռ արտաքին գործերի նախարար Գիդեոն Սաարը և մի շարք այլ պաշտոնյաներ հավանություն են տվել այդ ծրագրին։

Ուրբաթ օրը Համասը հայտարարել է, որ «դրական» է վերաբերվում ԱՄՆ-ի կողմից աջակցվող հրադադարի ծրագրին։ Սա հաջորդել է Թրամփի հայտարարությանը, համաձայն որի՝ Իսրայելը պայմանավորվել է 60-օրյա հրադադարի։

Սակայն կարևոր տարաձայնություններ մնում են։ Համասի դաշնակից պաղեստինյան խմբի ներկայացուցիչը պատշտել է, որ վեճի առարկա են մարդասիրական օգնությունը, Ռաֆա անցակետը և իսրայելական զորքերի դուրսբերման ժամանակացույցը։

Ռոյթերսի տվյալներով՝ Համասի և Իսրայելի միջև Կատարում անցկացված անուղղակի բանակցությունների առաջին փուլն ավարտվել է առանց արդյունքի։ Պաղեստինցի պաշտոնյաները պնդում են, որ իսրայելական պատվիրակությունը ժամանել է առանց համաձայնագիր ստորագրելու լիազորությունների։

Նեթանյահուի գրասենյակը հայտարարել է, որ Համասի կողմից առաջարկված փոփոխությունները «անընդունելի են»։ Սակայն բանակցությունները Կատարում կշարունակվեն՝ երկրի կողմից նախկինում ընդունված առաջարկի հիման վրա։

Վարչապետը կրկին ընդգծել է, որ Իսրայելը պահանջում է Համասի լիակատար զինաթափում, սակայն այդ հարցը դեռևս չի քննարկվում։ Նա նաև նշել է, որ Թրամփի հետ կքննարկի տարածաշրջանային անվտանգությունը՝ հատկապես Իրանի միջուկային ծրագրի վերաբերյալ մտահոգությունները։ Նրա խոսքով՝ Մերձավոր Արևելքում ստեղծված իրավիճակը բացում է նոր հնարավորություններ խաղաղության համար։