Շվեդիայում Ռուսաստանի առևտրային ներկայացուցչության շենքի վրա կրկին հարձակում է գրանցվել։ Ինչպես հաղորդում է Ռուսաստանի դեսպանատան մամուլի ծառայությունը, անօդաչու թռչող սարքը շենքի վրա ներկի տոպրակ է նետել։ Նախորդ նմանատիպ դեպքը տեղի էր ունեցել հունիսի 17-ին։

Վերջին դեպքը տեղի է ունեցել այսօր՝ տեղական ժամանակով մոտ 03:30-ին։ Ռուսաստանի դիվանագիտական առաքելությունը նշում է, որ այսպիսի հարձակումները շարունակվում են արդեն մեկ տարուց ավելի։

Դիվանագիտական ներկայացուցչությունը դիմել է Շվեդիայի ոստիկանությանը և Արտաքին գործերի նախարարությանը՝ հարձակումները կանխելու խնդրանքով։ «Սակայն, ինչպես տեսնում ենք, դեռևս ոչ մի արդյունք չի ձեռք բերվել», — ասված է դեսպանատան հաղորդագրության մեջ։

Ռուսական կողմը պահանջում է հետաքննել և՛ այս, և՛ նախկինում տեղի ունեցած հարձակումները։ Դեսպանատունը պահանջում է բացահայտել հարձակումների կազմակերպիչներին ու կատարողներին և նրանց պատասխանատվության ենթարկել։ Հաղորդագրության մեջ ընդգծվում է, որ իրավիճակի հետագա զարգացման համար ամբողջ պատասխանատվությունը կրում են Շվեդիայի իշխանությունները։

Հիշատակենք, որ Ռուսաստանի առևտրային ներկայացուցչությունը Շվեդիայում հանդիսանում է երկրի դիվանագիտական առաքելության մաս։ Նրա տարածքը վերահսկվում է Վիեննայի կոնվենցիայի նորմերով, որն ապահովում է օտարերկրյա դիվանագիտական առաքելությունների անձեռնմխելիությունը։