Հուլիսի 3-ին Միածնաէջ Մայր Տաճարում Սուրբ և Անմահ Պատարագ մատուցեց Բրազիլիայի թեմի առաջնորդ Գերաշնորհ Տ․ Նարեկ եպիսկոպոս Բերբերյանը։ Այս մասին տեղեկատվություն է ստացվել Մայր Աթոռի Տեղեկատվական համակարգից։

Պատարագի ընթացքում Սրբազան Հայրն իր քարոզում անդրադարձավ Հայոց աշխարհում Աստծո լույսի ուժին, որը ճառագեց Խոր Վիրապի խավարից։ Այնտեղ Սուրբ Գրիգոր Լուսավորիչը, չնայած լռության, ցրտի և մենության, անվերապահ հավատքով մնաց ամուր և Սուրբ Հոգու շնորհներով վերակերտեց Հայ եկեղեցին։

Նարեկ եպիսկոպոսը ընդգծեց, որ այդ հոգևոր վերածննդի արդյունքում հիմնադրվեց Սուրբ Էջմիածինը՝ որպես Աստծո հայտնության կենտրոն, որտեղ Նա հանդիպեց հայ ժողովրդին։

Սրբազանը նաև խոսեց այսօրվա դժվարությունների և եկեղեցու դեմ ուղղված հարձակումների մասին՝ հիշատակելով անազատության մեջ գտնվող հայերի մասին։

«Վերջին օրերին տեսածը կարելի է անվանել ամբողջ ազգի համար ամոթի օր։ Մեր երկու հոգևոր եղբայրները՝ Միքայել և Բագրատ Սրբազանները, ինչպես նաև ազգային բարերար Սամվել Կարապետյանը, այսօր «Վիրապում» են։ Նրանք լռում են, բայց նրանց աղոթքը հասնում է երկինք, և այդ ձայնը տարածվում է Սուրբ Էջմիածնից։

Սուրբ Էջմիածինն անսասան է՝ իր հոգևորականներով և Ամենայն Հայոց Կաթողիկոսի գլխավորությամբ։ Նրան անհնար է տապալել, քանի որ նրա հիմքը Հիսուս Քրիստոսն է», — ասաց Նարեկ Սրբազանը՝ կոչ անելով բոլորին հավատարիմ մնալ եկեղեցուն և աղոթել Հայաստանի խաղաղության, գերիների ազատության և տառապյալների մխիթարման համար։