23 տարի անց Լիբերալ-դեմոկրատական կուսակցության ընտրություններին կրկին առաջադրվել է վիճահարույց քաղաքական գործիչ Մունեո Սուձուկին։ 77-ամյա քաղաքական գործիչը հայտնի է Ռուսաստանի հետ կապերով և նախկինում ակտիվ մասնակցություն է ունեցել Հարավային Կուրիլյան կղզիների պատկանելիության հարցում փոխզիջում գտնելու փորձերին։ Ճապոնիայում դրանք անվանում են Հյուսիսային տարածքներ։ Մունեո Սուձուկին առաջադրվել է համամասնական ներկայացուցչության համակարգով, կուսակցական ընտրությունները հայտարարվել են հուլիսի 3-ին։

Քարոզարշավը քաղաքական գործիչը սկսել է Հոկայդոյի Նեմուրո քաղաքի Նոսապպու հրվանդանից, որը ցամաքի ամենաարևելյան կետն է։ Մունեո Սուձուկին, որը նախկինում զբաղեցրել է Հոկայդոյի զարգացման տարածաշրջանային բյուրոյի տնօրենի պաշտոնը, լրագրողների հետ հանդիպել է հրվանդանում՝ բաց տեսարան ունենալով դեպի Հյուսիսային տարածքները։

«Երկրորդ համաշխարհային պատերազմն ավարտվել է 80 տարի առաջ, — ասել է նա։ — Բայց այդքան տարիներ անց Հարավային Կուրիլների տարածքային վեճը դեռ չի լուծվել։ Այս ուղղությամբ ոչ մի քաղաքական որոշում չի ընդունվել, և դա ինձ խորապես տխրեցնում է։ Այս պահին ես կանգնած եմ ձեր առջև և հաստատում եմ իմ վճռականությունը մի բան անել այս հարցի վերաբերյալ, քանի դեռ վիճելի կղզիների նախկին բնակիչները դեռ կենդանի ու առողջ են»։

Այնուհետև Մունեո Սուձուկին մեկնել է Կուշիրո՝ մոտ 150 կմ արևմուտք, մունիցիպալիտետի շենքի դիմաց ելույթ ունենալու։ Հետո նա ուղևորվելու է Օկինավա՝ հույս դնելով ապահովել այն ձայների վրա, որոնք նա նվաճել էր Հոկայդոյի և Օկինավայի զարգացման տարածաշրջանային բյուրոյի տնօրեն լինելով։

Մունեո Սուձուկին լքել է ԼԴԿ-ն 2002 թվականին՝ կապված Հյուսիսային տարածքների աջակցությամբ կոռուպցիոն սկանդալի մեջ ներգրավվածության մեղադրանքների հետ։ Նրան մեղադրանք է առաջադրվել կաշառք վերցնելու և այլ իրավախախտումների համար և դատապարտվել երկու տարվա ազատազրկման։ 2019 թվականին Մունեո Սուձուկին «Ճապոնիայի վերածննդի ընկերակցություն» կուսակցության անդամ է ընտրվել, բայց 2023 թվականին լքել է այն։ Այս տարի՝ հունիսի 20-ին, նախկին կուսակցականն իրավունք է ստացել կրկին միանալ Լիբերալ-դեմոկրատական կուսակցությանը։

Կարդողների մեկնաբանություններ.

hir. Հյուսիսային տարածքների հարցը մեզանից՝ ճապոնացիներից բացի, ուրիշին չի անհանգստացնում։ Ռուսաստանում նույնիսկ կասկած չունեն, թե ումն են պատկանում կղզիները։ Նրանք հստակ գիտեն այս հարցի պատասխանը։ Այսօր ե՛ւ Հարավային Կուրիլները, ե՛ւ Հյուսիսային Կորեայի կողմից քաղաքացիների առևանգումները ընտրությունների ժամանակ ընտրական ձայներ հավաքելու գործիքներ են։ Ինձ համար սարսափելի է, որ մեր քաղաքական գործիչները թույլ են տալիս խաղալ Հարավային Կուրիլների նախկին բնակիչների և առևանգված մարդկանց հարազատների զգացմունքների հետ։

bit. Ճապոնիայի բոլոր կուսակցությունները խոսում են Հարավային Կուրիլների տարածքային պատկանելիության և հյուսիսկորեական հատուկ ծառայությունների կողմից քաղաքացիների առևանգման խնդիրների լուծման մասին։ Յուրաքանչյուր անգամ նույն պատմությունը։ Տվեք մեզ իշխանություն, և մենք ամեն ինչ կլուծենք։ Եւ նկատեք՝ ոչ մի կոնկրետ բան չկա։ Թող Մունեո Սուձուկին վերադառնա ԼԴԿ, բայց նրա խոսքերին հավատք չկա։

sin. Զավեշտալի է։ Մեկը օրենքներ է խախտում, հարկատուների դրամն անհաշիվ ծախսում, առանց որևէ արդյունքի, բայց վերադառնում է իշխանություն։ Մինչդեռ մեկ ուրիշին կուսակցությունից դուրս են անում ամուսնական դավաճանության կամ խորհրդարանական արտոնությունների չարաշահման համար։ Եվ կա երրորդ կատեգորիա՝ բարձրաստիճան պաշտոնյաներ, ովքեր դուրս են գալիս աշխատասենյակներից արդեն «հաստատված»։ Եվ այդ մարդիկ ներկայացնում են ժողովրդին։ Երևի այս տարի ես ընտրություններին չեմ գնա։

oak. Եկեք մոռանանք Հյուսիսային տարածքների մասին։ Եթե չլիներ Միացյալ Նահանգների հետ մեր մերձությունը, փոխադարձ օգնության պայմանագրերը, զինված ուժերի կարգավիճակի մասին համաձայնությունը և այլ գաղտնի պայմանավորվածություններ, գուցե մի բանի կարելի էր հույս դնել։ Բայց քանի դեռ այդ օրենքներն ուժի մեջ են, Ճապոնիան պարտավոր է ԱՄՆ-ին իր տարածքից ցանկացած մաս տրամադրել ռազմակայանի համար, Կուրիլների մասին կարելի է մոռանալ։ Մեր քաղաքական գործիչները, ինչպես միշտ, իրականությունից կտրված են և անհեթեթություններ են ասում։