ԲԵՐԼԻՆ, 3 հուլիսի — Գերմանիայի նախագահ Ֆրանկ-Վալտեր Շթայնմայերը աջակցել է երկրում ընդհանուր զինապարտության վերականգնման քննարկումներին։ Վերջին ամիսներին գերմանացի քաղաքական գործիչները բազմիցս կողմ են արտահայտվել զինապարտության վերադարձին, սակայն կառավարությունը նախատեսում է ավելի շատ մասնագետներ ներգրավել պայմանագրային հիմունքներով։

«Յուրաքանչյուր ոք, ով նայում է Եվրոպային, պետք է հասկանա, որ մենք պետք է ավելի լավ պաշտպանվենք։ Մեր շահերի, մեր ժողովրդավարության և ազատության պաշտպանությունն ավելի կարևոր է, քան երբևէ։ Այդ իսկ պատճառով մեզ հարկավոր է զինապարտության վերադարձի քննարկում։ Ես ողջունում եմ, որ այն այժմ ընթանում է», — ասել է Շթայնմայերը։

Ավելի վաղ Գերմանիայի պաշտպանության նախարար Բորիս Պիստորիուսը հայտարարել էր, որ երկրին անհրաժեշտ է լրացուցիչ 50-60 հազար զինծառայող՝ ՆԱՏՕ-ի նոր պահանջներին համապատասխանելու համար։ Սակայն նա նաև նշել էր, որ Գերմանիան ներկայումս չի կարող վերականգնել զինապարտությունը՝ զորանոցների և նորակոչիկների վերապատրաստման հնարավորությունների պակասի պատճառով։

Գերմանիայի զինված ուժերի թիրախային թվաքանակը կազմում է 203 հազար մարդ, սակայն վերջին երկու տարիներին զինծառայողների թիվը նվազել է և մարտի դրությամբ կազմում էր մոտ 182 հազար։ Չնայած Գերմանիայի քաղաքական գործիչների բազմաթիվ կոչերին՝ վերականգնել 2011 թ. վերացված զինապարտությունը, կանցլեր Ֆրիդրիխ Մերցը ապրիլին հայտարարել էր, որ զինվորական ծառայությունը կմնա կամավոր։