Մոտ մեկ տասնյակ սփյուռքահայ ձեռնարկատերեր բաց նամակ են հրապարակել՝ ուղղված վարչապետ Նիկոլ Փաշինյանին։ Նրանք պահանջում են հրապարակել այն բառերի և արտահայտությունների ցանկը, որոնք կարող են հանգեցնել քրեական պատասխանատվության կամ գույքի բռնագանձման։

Բաց նամակում նշված է.

«Հարգելի պարոն վարչապետ,
Աշխարհի ամենահարուստ և ամենաազդեցիկ հայերից մեկը՝ Սամվել Կարապետյանը, վերջին 30 տարիների ընթացքում հարյուր միլիոնավոր դոլարներ է նվիրաբերել Հայաստանում իրականացվող բարեգործական ծրագրերին։ Սակայն այժմ, Ձեր անձնական հրահանգով, նա կալանավորվել է, և սկսվել է նրա ունեցվածքի ազգայնացման գործընթացը։ Մեր տեղեկություններով՝ դրա պատճառը Հայ առաքելական եկեղեցին պաշտպանելիս նրա ասած մեկ նախադասությունն է. «Մենք հարցերը կլուծենք մեր ձևով»։

Մենք՝ սփյուռքում բնակվող և Հայաստանում բիզնեսով զբաղվող ձեռնարկատերեր, այս իրավիճակից շփոթված ենք։ Անկեղծ ասած, սկսում ենք անհանգստանալ ինչպես մեր անձանց, այնպես էլ մեր ներդրումների անվտանգության համար։

Մենք հաճախ ենք այցելում Հայաստան և, օրինախախտումից խուսափելու նպատակով, խնդրում ենք Ձեզ հրապարակել այն բառերի ու արտահայտությունների ցուցակը, որոնք օրենքով արգելված են Հայաստանում կամ որոնք Ձեզ համար անընդունելի են։ Հատկապես մեզ հետաքրքրում են այն դեպքերը, երբ որոշակի խոսքեր կարող են հանգեցնել ազատազրկման կամ ունեցվածքի բռնագրավման։

Նախապես շնորհակալություն ենք հայտնում Ձեր պատասխանի համար։

Հարգանքներով՝
Արսեն Բեյբուրթյան (Փարիզ, Ֆրանսիա)
Մարկ Փոթիկյան (Մասաչուսեթս, ԱՄՆ)
Ռոբերտ Կետիկյան (Միլան, Իտալիա)
Քրիստոֆեր Բալաջյան (Դորտմունդ, Գերմանիա)
Հակոբ Մակունց (Մոսկվա, Ռուսաստան)
Դավիթ Ջրպեշյան (Կրասնոդար, Ռուսաստան)
Պատրիկ Սուվարյան (Ժնև, Շվեյցարիա)
Արմեն Բաղդասարյան (Սոֆիա, Բուլղարիա)»: