Ներքին գործերի նախարարությունը քննարկումներ է անցկացրել կիբեռհանցագործություններից տուժած քաղաքացիների խնդրի լուծման վերաբերյալ։ Քննարկումներին մասնակցել են Փոխվարչապետ Մհեր Գրիգորյանի գրասենյակի, Քննչական կոմիտեի և Կենտրոնական բանկի ներկայացուցիչները։ Խոսքը վերաբերում է այն քաղաքացիներին, ում անունով խաբեությամբ վարկեր են ձևակերպվել։

ՆԳՆ-ի տվյալներով, տուժած քաղաքացիների պարտավորությունները բանկերի նկատմամբ կսառեցվեն մինչև քրեական գործի ավարտը։ Վարկերի գծով տոկոսներ չեն հաշվարկվի, իսկ նախկինում հաշվեգրված տոկոսները զրոյացվելու են։ Ժամկետանցումները կվերացվեն, և տուժածները չեն ընդգրկվելու «սև ցուցակում»։

«Նկատվում է կիբեռհանցագործությունների թվի նվազում. 2025 թվականի մարտին արձանագրվել է 85 դեպք, ապրիլին՝ 52, իսկ մայիսից մինչ օրս՝ ընդամենը 22 դեպք», — նշված է հաղորդագրության մեջ։

Դրական փոփոխությունները կապված են իրավապահ մարմինների և ֆինանսական հաստատությունների համատեղ աշխատանքի հետ։ Հիմնականում իրազեկիչ միջոցառումներ են իրականացվում։

Ներքին գործերի նախարարությունը շարունակում է համագործակցել բոլոր գերատեսչությունների հետ՝ կիբեռհանցագործությունները կանխելու և քաղաքացիների իրազեկվածությունը բարձրացնելու նպատակով։

«Հարգելի քաղաքացիներ, մի տրամադրեք անձնական տվյալներ կամ գաղտնաբառեր, մի կատարեք անցումներ անծանոթ հղումներով, մի վստահեք կասկածելի զանգերին և սոցիալական ցանցերի էջերին։ Եթե բանկի անունից զանգ, նամակ կամ գովազդ եք ստանում, անմիջապես կապ հաստատեք բանկի հետ», — զգուշացնում են ՆԳՆ-ից։