Հնագետները հին եգիպտական Իմետ քաղաքում հայտնաբերել են բազմահարկ տների և կոբրայի գլխով պատկերված Ուաջիտ աստվածուհու հետ կապված ծիսական կառույցի մնացորդներ։

Բազմաթիվ ճարտարապետական ավերակները վկայում են, որ Իմետը եղել է ակտիվ քաղաքային կենտրոն Եգիպտոսի ուշ շրջանում (մոտավորապես մ.թ.ա. 664-332 թթ.) կամ եգիպտական կառավարման վերջին փուլում՝ մինչև Ալեքսանդր Մակեդոնացու և նրա զորավար Պտղոմեոս I Սոտերի իշխանության գալը։ Այս մասին հայտնի է դարձել պեղումների վերջին արդյունքներից, որոնք կատարվել են Թել-Նաբաշա կոչվող տարածքում՝ Նեղոսի դելտայի արևելյան հատվածում գտնվող հնագիտական վայրում։

«Իմետը դառնում է Եգիպտոսի ուշ շրջանի հնագիտությունը վերահասկանալու համար կարևոր վայր»,— նշել է Նիկի Նիլսենը՝ Մեծ Բրիտանիայի Մանչեսթերի համալսարանի եգիպտագիտության ավագ դասախոսը, ով ղեկավարել է պեղումները։

Նիլսենի խոսքով, վերջերս հայտնաբերված բազմահարկ տները կամ աշտարակները, ամենայն հավանականությամբ, կառուցվել են հնագույն ժամանակներում՝ այս խոշոր քաղաքի աճող բնակչությանը տեղավորելու համար, հատկապես մ.թ.ա. չորրորդ դարում։

«Այսպիսի աշտարակ-տները հիմնականում հանդիպում են Նեղոսի դելտայում՝ ուշ շրջանից մինչև հռոմեական դարաշրջան, և հազվադեպ են Եգիպտոսի այլ վայրերում,— ասել է նա։— Դրանց առկայությունն այստեղ վկայում է, որ մենք գործ ունենք բարգավաճող և խիտ բնակեցված քաղաքի հետ, որը ուներ զարգացած քաղաքային ենթակառուցվածք»։