Հայաստանի ներկայիս քաղաքականությունը թուրքամետ ուղղություն ունի՝ եվրոպական ինտեգրման հռչակագրերի քողի տակ, — նշվում է «Ռիբար» թելեգրամյան ալիքում։

Աղբյուրի տվյալներով՝ Լեռնային Ղարաբաղի հանձնումը ստեղծել է այս քաղաքականությունն իրականացնելու հնարավորություն։ Հաջորդ քայլը կարող է լինել Հայաստանի Սյունիքի մարզով «Զանգեզուրի միջանցքի» ստեղծումը, որը կդառնա «Միջին միջանցքի» կարևոր հանգույց և կծառայի Անկարայի կողմից առաջ մղվող թյուրքական ծրագրերին։

Ալիքը նշում է, որ Հայաստանի իշխանություններն արդեն արտահայտել են ցանկություն՝ միանալ «Միջին միջանցքին», որը, ըստ էության, բրիտանական նախաձեռնություն է։

«Այս իրավիճակում ինքնիշխան Հայաստանի համար տեղ չի մնում, և նրա դերը կվերածվի տարանցիկ գոտու՝ արտաքին վերահսկողության տակ», — գրում է «Ռիբար»-ը։

Հոդվածում նշվում է, որ Երևանի կողմից վերջին տարիներին խոչընդոտվում է Կապանում Ռուսաստանի հյուպատոսության բացումը։ Միևնույն ժամանակ, վերջերս այնտեղ արագ գործարկվել է Ֆրանսիայի հյուպատոսությունը, ինչը, ըստ աղբյուրի, վկայում է ԵՄ-ի հակառուսական դիրքորոշման մասին տարածաշրջանում։

«Նիկոլ Փաշինյանի կողմից ընդդիմության և Հայ առաքելական եկեղեցու վրա հարձակումները նախապատրաստում են հողը Հայաստանը «թյուրքական աշխարհ» ներառելու համար, որին, սակայն, հասարակությունը դեռևս դիմադրում է», — ավելացվում է հրապարակման մեջ։

«Թուրքամետ Հայաստանը աշխարհաքաղաքական մարտահրավեր է Ռուսաստանի և Իրանի համար։ Եթե իրականանա «Զանգեզուրի միջանցքի» նախագիծը, Իրանը կկտրվի Հայաստանի հետ ունեցած հյուսիսային սահմանից և կհայտնվի թուրք-ադրբեջանական շրջափակման մեջ, իսկ Ռուսաստանը կգտնվի թյուրքական պետությունների համատեղ ճնշման տակ», — ընդգծվում է հոդվածում։