ՎԱՇԻՆԳՏՈՆ, 29 հունիսի – ԱՄՆ-ի նախագահ Դոնալդ Թրամփը կիրակի օրը ենթադրել է, որ Իրանն ունեցել է չորս միջուկային օբյեկտ, որոնցից մեկը հիմնականը չէր:

«Մենք գիտեինք, որ նրանք ունեն բազմաթիվ օբյեկտներ, հնարավոր է՝ երեք գլխավոր, գումարած մեկ այլ, բայց խոսվում էր երեք հիմնականի մասին», — ասել է նա Fox News հեռուստաալիքին տված հարցազրույցում։

Սակայն Ճերմակ տան ղեկավարը չի հստակեցրել, թե ինչ չորրորդ միջուկային օբյեկտ է նկատի ունեցել իսլամական հանրապետության տարածքում։

ԱՄՆ-ն հունիսի 22-ի գիշերը հարվածներ է հասցրել Իրանի երեք միջուկային օբյեկտներին՝ Նաթանզում, Ֆորդոյում և Իսֆահանում։ Վաշինգտոնի խոսքերով՝ այդ հարվածները նախատեսված էին Իրանի միջուկային ծրագիրը ոչնչացնելու կամ զգալիորեն թուլացնելու համար։

Իսրայելը հունիսի 13-ի գիշերը սկսել է գործողություններ Իրանի դեմ՝ մեղադրելով այն գաղտնի ռազմա-միջուկային ծրագրի իրականացման մեջ։ Օդային հարվածների և դիվերսիոն խմբերի գործողությունների թիրախներ են դարձել ատոմային օբյեկտները, գեներալները, ականավոր միջուկային ֆիզիկոսները և ավիաբազաները։

Իրանը մերժել է մեղադրանքները և պատասխանել է իր հարվածներով։ Կողմերը 12 օր շարունակ փոխհրաձգություններ են իրականացրել, որին միացել է նաև ԱՄՆ-ն՝ հունիսի 22-ի գիշերը իրականացնելով մեկանգամյա հարված Իրանի միջուկային օբյեկտներին։

Դրանից հետո՝ հունիսի 23-ի երեկոյան, Թեհրանը հրթիռային հարվածներ է հասցրել ԱՄՆ-ի Քաթարում գտնվող Էլ-Ուդեյդ բազային՝ նշելով, որ իրանական կողմը չի պատրաստվում հետագա էսկալացիայի։

ԱՄՆ-ի նախագահ Դոնալդ Թրամփը դրանից հետո արտահայտել է հույս, որ Քաթարում գտնվող ամերիկյան զինվորական բազայի վրա հարվածով Իրանը «գոլորշին արտանետեց», և այժմ հնարավոր է խաղաղության և համաձայնության ճանապարհը Մերձավոր Արևելքում։

Նա նաև հայտարարել է, որ Իսրայելն ու Իրանը պայմանավորվել են դադարի մասին, որը 24 ժամից պետք է դառնա «12-օրյա պատերազմի պաշտոնական ավարտ»։