ԱՄՆ-ի նախագահ Դոնալդ Թրամփը վստահ է, որ Իրանը նախապես չէր կարող իմանալ ԱՄՆ-ի ռազմական հարվածների մասին մինչև դրանց իրականացումը: Այդ մասին նա հայտարարել է Fox News հեռուստաալիքին տված հարցազրույցում:

«Նրանք հատուկ նախազգուշացում չունեին, քանի որ չգիտեին, որ մենք կհարվածենք մինչև վերջին պահը»,— ասել է Թրամփը:

Ամերիկյան նախագահը շարունակում է պնդել, որ Թեհրանը Ֆորդոյի միջուկային կայանից ուրանի պաշարներ չի տեղափոխել, քանի որ, ըստ նրա, նման գործողությունը «շատ լուրջ և վտանգավոր» կլիներ:

«Բացի այդ, ոչ ոք չէր կարծում, որ մենք կհարվածեինք այդ օբյեկտին (Ֆորդո), որովհետև բոլորն ասում էին, որ այն հասանելի չէ»,— ավելացրել է Թրամփը:

Սակայն հինգշաբթի օրը Թրամփը Truth Social սոցցանցում հրապարակված հայտարարությունում պնդել էր, որ Իրանը Ֆորդո է ուղարկել բետոնապատող բեռնատարներ՝ հարվածներից առաջ «ծածկելու» համար հանքերի վերին մասերը:

Նախկինում New York Times թերթը, հղում կատարելով աղբյուրների, հաղորդել էր, որ Իրանը Ֆորդոյի միջուկային օբյեկտից սարքավորումներ և ուրան է տեղափոխել հարվածներից մի քանի օր առաջ:

Միևնույն ժամանակ, Պուլիտցերյան մրցանակակիր լրագրող Սեյմուր Հերշը, ինչպես նշում են աղբյուրները, պնդել է, որ ԱՄՆ-ի հարվածները Ֆորդոյում ոչնչացնելու համար հարստացված ուրանի պաշարները:

Հերշի տվյալներով՝ Իրանի հարստացված ուրանի պաշարները անվնաս են, բայց այժմ «գործնականորեն անհասանելի են, հնարավոր է՝ հավերժ»:

Իսրայելը հունիսի 13-ի գիշերը սկսել է գործողություն Իրանի դեմ՝ մեղադրելով վերջինիս գաղտնի ռազմամիջուկային ծրագրի իրականացման մեջ:

Օդային հարվածների և դիվերսիոն խմբերի թիրախներ են դարձել միջուկային օբյեկտները, գեներալները, ականավոր միջուկային ֆիզիկոսները և ավիաբազաները:

Իրանը մերժել է մեղադրանքները և պատասխանել է իր սեփական հարվածներով: Երկու կողմերը 12 օր շարունակ փոխհրաձգություններ են ունեցել, որին միացել է նաև ԱՄՆ-ը՝ հունիսի 22-ի գիշերը մեկ հարված հասցնելով Իրանի միջուկային օբյեկտներին:

Սրանից հետո Թեհրանը հունիսի 23-ի երեկոյան հրթիռային հարվածներ է հասցրել ԱՄՆ-ի Ալ-Ուդեյդ բազային Քաթարում՝ հայտարարելով, որ իրանական կողմը չի պատրաստվում հետագա սրացման գնալ:

ԱՄՆ-ի նախագահ Դոնալդ Թրամփը դրանից հետո արտահայտել է հույս, որ՝ Քաթարի ամերիկյան ռազմական բազայի վրա հարվածով Իրանը «արտանետել է գոլորշին», և այժմ հնարավոր է խաղաղության ճանապարհը Մերձավոր Արևելքում:

Նա նաև հայտարարել է, որ Իսրայելը և Իրանը համաձայնության են եկել զինադադարի մասին, որը 24 ժամ անց պետք է դառնա «12-օրյա պատերազմի պաշտոնական ավարտը»: