Ազգային ժողովի կայքում հրապարակվել է Հայաստանի էլեկտրացանցի (ՀԷՑ) պետականացման նախագիծը:

Փաստաթղթում ուղղակի հիշատակում չկա ՀԷՑ-ի մասին, սակայն Քաղաքացիական պայմանագիր կուսակցությունը առաջարկում է փոփոխություններ կատարել «Հանրային ծառայությունները կարգավորող մարմնի մասին» օրենքի 9-րդ հոդվածում:

Փոփոխությունների նախագծում նշված է. «Եթե կառավարության լիազոր մարմինը հաղորդում է, որ վտանգված է էներգետիկայի ոլորտի համակարգերի անվտանգությունը, հուսալիությունը կամ առկա է լիցենզիայի պայմանների խախտում, ապա Հանձնաժողովը 5 օրվա ընթացքում պարտավոր է սկսել վարչական գործընթաց»:

Կառավարությունը նաև առաջարկում է «Էներգետիկայի մասին» օրենքում ավելացնել նոր դրույթ՝ կանխարգելիչ միջոցառումների մասին: Դրա համաձայն՝ կարգավորող հանձնաժողովը կկարողանա նշանակել ժամանակավոր կառավարիչ կամ պարտադրել խախտումները վերացնելու ծրագիր:

ժամանակավոր կառավարիչ կարող է դառնալ էներգետիկայի կամ կառավարման ոլորտում 5 տարվա փորձ ունեցող մասնագետ: Նախագիծը նախատեսում է նաև, որ ՀԷՑ-ի բաժնետոմսերի 25%-ից ավելի գնման դեպքում կառավարությունը կունենա նախապատվության իրավունք:

Ըստ ծրագրի՝ նախագիծը Ազգային ժողովում քննարկվելու է հուլիսի 1-ի արտահերթ նիստում։ Զեկուցողը կլինի Վլադիմիր Վարդանյանը:

Հիշեցնենք, որ ավելի վաղ ՊՎԾ-ի ղեկավար Ռոմանոս Պետրոսյանը նշել էր, որ ՀԷՑ-ի պետականացումից հետո այն կարող է տրամադրվել մասնավոր սեկտորին: