Շիրակի մարզում վրաերթի հետևանքով մարդ է զոհվել

Այսօր՝ հունիսի 26-ին, ժամը 07:00-ի սահմաններում, Գյումրի քաղաքի Անկախության հրապարակում մահացու վրաերթ է տեղի ունեցել:

38-ամյա Գարեգին Ա.-ն, ով Շիրակի մարզի բնակիչ է, իր վարած «Opel» մակնիշի ավտոմեքենայով հարվածել է 58-ամյա Արմենուհի Ս.-ին, ով նույնպես Շիրակի մարզի բնակիչ էր:

ՀՀ ՆԳՆ Շիրակի մարզի ոստիկանությունը հաստատում է, որ վարորդը փախուստի չի դիմել և անմիջապես ահազանգել է շտապօգնություն: Շտապօգնության բուժանձնակազմը Արմենուհի Ս.-ին ծայրահեղ ծանր վիճակում տեղափոխել է Գյումրու բժշկական կենտրոն:

Դեպքի վայր են ժամանել Շիրակի մարզի ոստիկանության պարեկային ծառայության աշխատակիցներ՝ գումարտակի հրամանատար Լևոն Մարտիրոսյանի և նրա տեղակալ Վանիկ Սաղոյանի ղեկավարությամբ:

Իրավապահ մարմիններին տեղեկացվել է Շիրակի մարզի քննչական վարչությունից՝ քննիչների խումբը ժամանել է դեպքի վայր:

Քննչական խմբի ժամանումից առաջ հիվանդանոցից ստացվել է տեղեկություն, որ Արմենուհի Ս.-ն գիտակցությունը չվերականգնելով մահացել է:

Շիրակի մարզային քննչական վարչությունում այդ դեպքով նախաձեռնվել է քրեական գործ: Վարորդը սթափության փորձաքննության է ենթարկվել և ալկոհոլի ազդեցության տակ չի գտնվել:

Հայտնի է դարձել, որ զոհվածն աշխատել է Գյումրու քաղաքապետարանի կոմունալ բաժնում:

Ծանուցում: Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով: