ՄՈՍԿՎԱ, հունիսի 24. Կատարը ՄԱԿ-ին ուղղված նամակ է ուղարկել՝ Իրանին մեղադրելով Կատարի ինքնիշխանությունը խախտելու մեջ: Այս մասին երեքշաբթի հայտարարել է Կատարի արտաքին գործերի նախարարությունը:

«Կատարի պետությունը նամակ է ուղարկել ՄԱԿ-ի գլխավոր քարտուղար Անտոնիու Գուտեռեշին, ՄԱԿ-ում Գայանայի մշտական ներկայացուցչին և Անվտանգության խորհրդի նախագահին… Կատարի պետությունը նրանց տեղեկացրել է ծայրահեղ վտանգավոր սրացման մասին, որն ակնհայտորեն խախտում է Կատարի ինքնիշխանությունն ու տարածքային ամբողջականությունը և սպառնալիք է հանդիսանում տարածաշրջանային խաղաղությանն ու անվտանգությանը», – ասված է նախարարության հայտարարությունում:

Կատարը շեշտել է, որ ՄԱԿ-ի Անվտանգության խորհուրդը պետք է կատարի իր պարտականությունները՝ հիմնվելով կանոնագրքի վրա, և հաստատել է անհրաժեշտությունը՝ արագ միջոցներ ձեռնարկել Մերձավոր Արևելքում անհապաղ և առանց պայմանների կրակի դադարեցում հաստատելու համար: Դա կօգնի կանխել վտանգավոր երկարատև սրացումը տարածաշրջանում:

Երկուշաբթի երեկոյան Իրանը հրթիռային հարվածներ է հասցրել Կատարում գտնվող ԱՄՆ-ի ռազմակայանին: Արձակված 19 հրթիռներից միայն մեկը հասել է ռազմակայանի տարածք, որտեղից ամերիկացի զինվորականները նախապես տարհանվել էին, իսկ մնացածը խոցվել են: Կատարի պաշտպանության նախարարության տվյալներով՝ հարձակումը զոհեր կամ վիրավորներ չի պատճառել: Խոցված հրթիռների բեկորներն ընկել են երկրի տարբեր մասերում գտնվող բնակելի թաղամասեր՝ առաջացնելով մի քանի փոքր հրդեհներ:

Կատարի արտաքին գործերի նախարարությունը և Պարսից ծոցի այլ երկրներ կտրուկ դատապարտել են Իրանի հարձակումը և սպառնացել «պատասխան քայլերին»՝ հարմար ժամանակ: