Վարչապետ Նիկոլ Փաշինյանի որոշմամբ Տիգրան Պետրոսյանը նշանակվել է Հայաստանի սննդամթերքի անվտանգության տեսչական մարմնի ղեկավար։

Պաշտոնական փաստաթղթում նշված է. «Ղեկավարվելով «Տեսչական մարմինների մասին» և «Հանրային ծառայության մասին» օրենքներով՝ Տիգրան Պետրոսյանին նշանակել սննդամթերքի անվտանգության տեսչական մարմնի ղեկավար»։

Նույն օրը Պետրոսյանն ազատվել է Սննդամթերքի անվտանգության տեսչական մարմնի (ՍԱՏՄ) ղեկավարի տեղակալի պաշտոնից։

Տիգրան Պետրոսյանը համարվում էր ՍԱՏՄ ղեկավարի հիմնական թեկնածուն, քանի որ վայելում է վարչապետի վստահությունը։ Նա պատկանում է Փաշինյանի մերձավոր շրջապատին։

Նախքան այս նշանակումը Պետրոսյանը ղեկավարել է «Սպասարկում» ՊՈԱԿ-ը, որը զբաղվում է կառավարական շենքերի սպասարկմամբ։ 2020-2021 թվականներին նա եղել է «Կառավարական առանձնատների տնտեսություն» ՊՈԱԿ-ի տնօրենի տեղակալ։

Մասնագիտությամբ տնտեսագետ և աշխարհագրագետ Պետրոսյանն իր կարիերան սկսել է Ազգային անվտանգության ծառայությունում։ Նախկինում նա ղեկավարել է «Էյր լոգիստիկ կարգո» ՍՊԸ-ը, որը զբաղվում է միջազգային բեռնափոխադրումներով։

Հիշեցնենք, որ ապրիլի 30-ին վարչապետ Փաշինյանը ստորագրել էր Արմեն Դանիելյանի՝ ՍԱՏՄ ղեկավարի պաշտոնից ազատման որոշումը։

Տեղեկություններ կային, որ ՍԱՏՄ համակարգում առկա դժգոհությունների պատճառով Դանիելյանը ինքնակամ հրաժարական է տվել։

Տարեսկզբին Դանիելյանը նախաձեռնել էր կառուցվածքային փոփոխություններ, այդ թվում՝ մարզային բաժինների լուծարում և լաբորատորիաների օպտիմալացում, սակայն այդ քայլերը հավանության չէին արժանացել։