Այսօր ԹՈՒՄՈ կենտրոնում տեղի ունեցավ «Հայաստան-ԵՄ կրթական երկխոսություն» միջոցառումը, որը կազմակերպվել էր ԿԳՄՍ նախարարության, Հայաստանում Եվրոպական միության և ՅՈՒՆԻՍԵՖ-ի՝ ՀՀ կրթական բարեփոխումների վերաբերյալ քաղաքականության երկխոսության հարթակի շրջանակում:

Միջոցառման մասնակցել են ԿԳՄՍ նախարար Ժաննա Անդրեասյանը, ՀՀ-ում ԵՄ պատվիրակության ղեկավար դեսպան Վասիլիս Մարագոսը, ՅՈՒՆԻՍԵՖ-ի ներկայացուցիչ Քրիսթինե Վայգանդը, ԿԳՄՍ նախարարի տեղակալներ Արթուր Մարտիրոսյանը և Արաքսիա Սվաջյանը, ԿԳՄՍՆ բարձրագույն կրթության և գիտության կոմիտեի նախագահ Սարգիս Հայոցյանը: Նրանց հետ միասին՝ ներկա էին նաև դեսպաններ և միջազգային ու կրթական կազմակերպությունների ներկայացուցիչներ:

Հանդիպման հիմնական թեմաները ներառում էին կրթական համակարգի բարեփոխումները, առկա մարտահրավերներն ու զարգացման հնարավորությունները՝ կրթական ոլորտում Հայաստան-ԵՄ համագործակցության շրջանակում:

Ժաննա Անդրեասյանը, բացելով միջոցառումը, նշել է, որ այս ձևաչափով հանդիպումները դարձել են երկխոսության կարևոր միջոց: «Այս հանդիպումները թույլ են տալիս քննարկել և գնահատել կրթության ոլորտում արձանագրված համագործակցության արդյունքները նվազագույնը տարին երկու անգամ»,- նշել է Անդրեասյանը:

«Համագործակցության տարիները շատ բարեփոխումներով են հագեցած եղել։ Հանրակրթության չափորոշիչի ներդրումը մեր կարևոր նախաձեռնություններից մեկն է։ Դա հնարավոր դարձավ համատեղ ջանքերով, իսկ բյուջետային աջակցության ծրագիրը շարունակելու է այս նախաձեռնությունը՝ ապահովելով բարձրորակ կրթության հավասար հնարավորություններ բոլոր երեխաների համար»,- նշել է նախարար Անդրեասյանը:

Նա նաև շնորհակալություն է հայտնել ՅՈՒՆԻՍԵՖ-ին՝ կրթության ռազմավարության իրականացման ընթացքում ցուցաբերած աջակցության համար. «Այս թիմային աշխատանքը հնարավորություն է տալիս համատեղ քննարկել ընթացքը, փոխանակվել փորձով և տեսնել իրական արդյունքները: Կրթության ռազմավարությունը մեր երկրի կարևորագույն փաստաթղթերից է, քանի որ այն ներկայացնում է պետական զարգացման ռազմավարությունը»,- ավելացրել է նա:

Անդրեասյանը անդրադարձել է նաև նոր «Բարձրագույն կրթության և գիտության մասին» օրենքի ընդունմանը և Գիտության զարգացման ռազմավարությանը, որը այժմ քննարկման փուլում է: Նա շնորհավորել է գիտական հանրույթին՝ Գիտության միջազգային օրվա առիթով:

Դեսպան Վասիլիս Մարագոսը նշել է, որ կրթության և մարդկային կապիտալի զարգացումը ԵՄ-ի և Հայաստանի համագործակցության առաջնահերթություն է. «Կրթությունը կարևոր դեր ունի երկրի կայունության համար և նպաստում է հմտությունների ու կարողությունների զարգացմանը»: Նա հավելել է, որ ժողովրդավարական արժեքների տարածումը ԵՄ-ի և Հայաստանի համագործակցության հենակետերից է:

Մարագոսը նշել է նաև մեդիագրագիտության շաբաթվա միջոցառումների մասին՝ ավելացնելով, որ տարբեր մարզերում իրականացվում են ծրագրեր մեդիագրագիտության զարգացման նպատակով:

Քրիսթինե Վայգանդը նույնպես ողջունել է ներկաներին՝ ընդգծելով, որ այս հանդիպումը կարևոր է կրթական բարեփոխումների քննարկման համար. «Հայաստանը կհասնի կրթության զարգացման ծրագրի միջնակետին, և ՅՈՒՆԻՍԵՖ-ը շարունակում է աջակցել»: Նա նշել է ուսուցչների զարգացման, դպրոցների կառավարման բարեփոխման և ռազմավարական պլանավորման ոլորտներում իրականացվող աջակցության մասին:

Միջոցառման ընթացքում Արթուր Մարտիրոսյանը, Արաքսիա Սվաջյանը և Սարգիս Հայոցյանը քննարկել են կրթության զարգացման պետական ծրագիրը՝ մինչև 2030 թվականը: Ներկայացվել են նաև ԵՄ բյուջետային աջակցության ընթացքը, ՀՀ կրթական համակարգի արագ հայտնաբերման (RED) արդյունքները և հետագա քայլերը, ինչպես նաև ԹՈՒՄՈ և «Արհեստական բանականության ՍԵՐՈՒՆԴ» ծրագրերը: