Հարավային Կովկասում կայունությունն ապագայում կախված կլինի տարածաշրջանի հիմնական խաղացողների կողմից ուժերի հարաբերակցության կառավարումից և Հայաստանի ու Ադրբեջանի միջև խաղաղության գործընթացի վերահսկումից։ Այս մասին գրում է Newsweek ամսագիրը:

Aդրբեջանի նախագահ Իլհամ Ալիևը նշել է, որ ադրբեջանական բանակը այժմ համապատասխանում է ՆԱՏՕ-ի չափանիշներին։ Նա ընդգծել է այս գործընթացի շրջանակում թուրքական զինվորականների հետ սերտ համագործակցությունը։ Ադրբեջանը և ՆԱՏՕ-ն համագործակցում են 1994 թվականից՝ «Գործընկերություն հանուն խաղաղության» ծրագրի միջոցով, որը ՆԱՏՕ-ն նախաձեռնել է Արևելյան Եվրոպայի և Կովկասի երկրների համար:

Ռուս ռազմական վերլուծաբանները զգուշացնում են, որ Ադրբեջանը կարող է իր ռազմավարական հնարավորությունները զարգացնել ՆԱՏՕ-ի մեթոդներով, ակտիվացնել վերազինման ու արևմտյան զինամթերքների գնման գործընթացը։

Վերլուծաբանների խոսքով, Ադրբեջանի ռազմական արդիականացումը ՆԱՏՕ-ի չափանիշներով հուշում է ապագա համագործակցությանը, սակայն Բաքուն դեռևս պաշտոնապես դիմում չի ներկայացրել:

Ռուսաստանի համար ևս մեկ խորը խնդիր է Ադրբեջանի սերտ կապը ՆԱՏՕ-ի անդամ Թուրքիայի հետ, ինչը կարող է ուժեղացնել լարվածությունը Հարավային Կովկասում՝ ազդեցություն ունենալով Ռուսաստանի և Իրանի կապերի վրա:

Թուրքիան աջակցել է Ադրբեջանին Հայաստանի հետ հակամարտության ժամանակ, երբ Ռուսաստանը աջակցում էր Հայաստանին։ Ալիևը հանդիպել է Պուտինի հետ Տաջիկստանում՝ 2024 թվականի լարված իրադարձությունների հետո:

Ադրբեջանի համար էլ կարևոր է պահպանել հարաբերությունները Ռուսաստանի հետ, որը Բաքվի հիմնական գործարար և ռազմավարական գործընկերն է։ Միևնույն ժամանակ, Բաքուն զարգացնում է կապերը արևմտյան երկրների հետ՝ Մոսկվայի ազդեցությունից պաշտպանվելու համար։