Դուբայը ճանաչվել է աշխարհի ամենագրավիչ քաղաքներից մեկը բարձր կարողություն ունեցող անձանց համար՝ ըստ Savills Plc անշարժ գույքի գործակալության կողմից կազմված վարկանիշային աղյուսակի։

Savills-ի վերլուծաբանները գնահատել են աշխարհի 30 խոշոր քաղաքները։

Դուբայի գրավչությունը հիմնվում է մի շարք կարևոր գործոնների վրա, այդ թվում՝ ժառանգության հարկի բացակայությունը, կապիտալի զգալի աճը, զարգացած ենթակառուցվածքները, անվտանգության բարձր մակարդակը, ինչպես նաև միջազգային դպրոցների ամենամեծ թիվը տարբեր քաղաքների համեմատ։

Բացի այս, ԱՄԷ-ն բնակիչներին առաջարկում է «ոսկե վիզա», որը մի շարք հնարավորություններ է բացում։ 2 միլիոն դիրհամ (544 հազար 500 դոլար) ներդրման դիմաց տրվում է 10 տարվա բնակության իրավունք և հարկային արտոնություններ։

Savills-ի վարկանշային աղյուսակում Նյու Յորքը զբաղեցնում է երկրորդ տեղը։ Մասնագետները ընդգծում են քաղաքի բարենպաստ բիզնես միջավայրը, հարկային խթանները և աշխարհաքաղաքական կայունությունը։

Բարեկեցիկ տարեցների բնակության վայր ընտրելու հիմնական գործոններից մեկը ժառանգության հարկի առկայությունն է։ Մասնավորապես, կյանքի որակի վարկանիշում առաջինը գտնվող Լոնդոնը հետ է մղվել առևտրային ցուցանիշներով՝ Մեծ Բրիտանիայի հարկային համակարգի պատճառով, ինչը հանգեցրել է անշարժ գույքի պահանջարկի նվազմանը։

Savills-ի տվյալների համաձայն՝ համաշխարհային հարստությունը վերականգնվում է 2022 թվականի անկումից հետո, և Ասիա-խաղաղօվկիանոսյան տարածաշրջանում նկատվում է ամենաարագ աճը։ 2024 թվականին ի հայտ է եկել ավելի քան 680 հազար նոր դոլարային միլիոնատեր՝ աճելով 1.2%։ Մինչև 2029 թվականը միլիոնատերերի թիվը կաճի ավելի քան 5 միլիոնով՝ ըստ կանխատեսումների։