Գյումրիում բնակվող ԲՀԿ Շիրակի մարզային կառույցի կանանց խորհրդի նախագահ, ՇՊՀ դասախոս և լրագրող Հասմիկ Վիրաբյանը արդեն չորս ամիս է, ինչ գտնվում է տնային կալանքի տակ։ Հասմիկ Վիրաբյանի մայրը՝ Շողիկ Մխիթարյանը, պատմել է իր դստեր իրավիճակի մասին՝ նշելով, որ առաջադրված խարդախության մեղադրանքները «ամբողջապես անհիմն են»։

Մոր խոսքով, իր դուստրը առողջական լուրջ խնդիրներ ունի, իսկ նրա երեք անչափահաս երեխաները գտնվում են հոգեբանական ծանր վիճակում։ «Չորս ամիս փորձում ենք սպասել և հուսալ, բայց հիմա ես որպես մայր չեմ կարող լռել։ Հիմա ես բարձրաձայնելու եմ։ Պատրաստ եմ տրամադրել ապացույցներ, եթե անհրաժեշտություն լինի»։

Շողիկ Մխիթարյանի փոխանցմամբ, Հասմիկ Վիրաբյանը երկար տարիներ զբաղվել է բարեգործությամբ և սոցիալական ծրագրերով։ Վիրաբյանի նախաձեռնությամբ Գյումրիում հիմնվել է «Հերոսների պուրակը», և օգնել դրամատիկական թատրոնին՝ տրամադրելով շուրջ 30.000 դոլար արժողությամբ ավտոբուս։ Նա նաև ապահովել է անապահով երեխաների հանգիստը ծովամերձ հանգստավայրերում։ Նրա վերջին նախագիծը վերաբերում էր զինվորի հուշաքարի բարեկարգմանը, որի համար նա համագործակցել է նաև զինվորի մոր հետ։ Ծրագրի համար անհրաժեշտ գումարը տրամադրել է ԲՀԿ առաջնորդ Գագիկ Ծառուկյանը։

«Նոյեմբերի 9-ին նախատեսվում էր բացել ծրագիրը՝ նվիրված պատերազմի 5-րդ տարելիցին։ Գյումրիում բոլորն էլ գիտեն, որ դստերս ցանկացած նախաձեռնություն հաջողությամբ է պսակվել։ Նա մտերիմ էր զինվորի մոր հետ։ Ծրագրերի բոլոր միջոցները օգտագործվել են ճիշտ նպատակներով։ Բոլորն էլ գիտեն և ճանաչում են մեզ։ Կարող է պարոն Ծառուկյանը հաստատել, թե արդյոք իմ դուստրը խարդախ է եղել, արդյոք խաբել է նրան կամ անվնաս կարող է համարվել»– նշում է Վիրաբյանի մայրը։

Ընտանիքն ուղղված է կոչ անում իրավապահ մարմիններին, որպեսզի հաշվի առնեն ոչ միայն մեղադրանքի հիմքերը, այլև Հասմիկի առողջական խնդիրները և երեխաների հոգեբանական ծանրությունները։

Դատալեքս տեղեկատվական համակարգի տվյալներով՝ Հասմիկ Վիրաբյանը մեղադրվում է, որ ֆինանսական խնդիրներ ունենալով՝ նպատակ է ունեցել խարդախությամբ Գագիկ Ծառուկյանից հափշտակել խոշոր չափերով գումար: