Նոյեմբերի 4-ին Ներքին գործերի նախարարությունում կայացավ ՀՀ թմրամիջոցների ու հոգեմետ նյութերի շրջանառության վերահսկման և ապօրինի շրջանառության կանխարգելման միջգերատեսչական հանձնաժողովի հերթական նիստը, որը վարում էր հանձնաժողովի նախագահ, ՆԳՆ ոստիկանության պետի տեղակալ Վարդան Վարդանյանը։

ՆԳՆ-ից հայտնում են, որ հանձնաժողովում ընդգրկված էին ՆԳ նախարարության ոստիկանության, Ազգային անվտանգության ծառայության, Գլխավոր դատախազության, Պաշտպանության, Առողջապահության, Արդարադատության նախարարությունների, Քննչական կոմիտեի և Պետական եկամուտների կոմիտեի համապատասխան ստորաբաժանումների ղեկավարներ։

Հանձնաժողովի նախագահ Վարդան Վարդանյանը, անդրադառնալով թմրամիջոցների ապօրինի շրջանառության դեմ պայքարի շրջանակում իրականացվող աշխատանքներին, կարևորեց շահագրգիռ գերատեսչությունների համագործակցությունը՝ նպատակ ունենալով համընդհանուր խնդրի դեմ պայքարում դրական արդյունքներ արձանագրել։

Հանձնաժողովի անդամները ներկայացրեցին տարեվերջյան շարժանկարը թմրամիջոցների ապօրինի շրջանառության դեմ պայքարի շրջանակում կատարված աշխատանքից, ինչպես նաև հայտնաբերման, բացահայտման և կանխարգելման ուղղությամբ գործադրված հաղարգելային քայլերը։

Անդրադարձ կատարվեց մաքսանենգ ճանապարհով թմրամիջոցների տեղափոխմանը դիմագրավելու անհրաժեշտությանը՝ միաժամանակ կարևորելով այդ պարագայում համատեղ նախաձեռնվող միջոցառումների արդյունավետությունը։

Քննարկվեցին նաև ՄԱԿ-ի Թմրամիջոցների դեմ պայքարի հանձնաժողովի 69-րդ նստաշրջանի ընթացքում Հայաստանի նախագահությամբ գործողություններն ու ընթացքն ապահովելու հարցերը։ Որոշվեց կոնկրետ առաջարկություններ տալ նշված խնդիրների լուծման ուղղությամբ:

Վարդան Վարդանյանը, կարևորելով արդյունվետ քննարկումը, շնորհակալություն հայտնեց միջգերատեսչական հանձնաժողովի բոլոր անդամներին և ընդգծեց թմրամիջոցների անօրինական շրջանառության դեմ պայքարի ուղղությամբ ամենօրյա հետևողական աշխատանքի անհրաժեշտությունը։