Գերմանիայի ատամնաբույժների մասնագիտական համայնքն անցկացրեց հիշատակի արարողություն՝ ընդունելով իրենց դերի սադիստական կողմերը նացիզմի տարիներին, տեղեկացնում է The Guardian-ը։

Գերմանական ատամնաբուժության, բերանի խոռոչի և դիմածնոտային բժշկության ընկերությունը (DGZMK)՝ որպես կենտրոնական մասնագիտական կազմակերպություն, 2025 թվականի հոկտեմբերի 29-ին Բեռլինի Հումբոլդտի համալսարանում կազմակերպեց առաջին պաշտոնական միջոցառումը, որը նվիրված էր ատամնաբույժների դերակատարությանը նացիստական ռեժիմի հանցագործություններում և դրա զոհերի հիշատակին։

Ազգային ատամնաբուժական ասոցիացիայի պարտադիր առողջապահական ապահովագրության խորհրդի նախագահ Մարտին Հենգեսը նշել է. «Մեր մասնագիտական համայնքում պարտավոր ենք ուսումնասիրել անցյալը և հստակ դիրքորոշում ունենալ հակասեմիտիզմի, մեկուսացման և մարդկության նկատմամբ արհամարհանքի բոլոր ձևերի դեմ»։

Վերջին տարիների ուսումնասիրությունները՝ ուղղված Հիտլերի ժամանակաշրջանում նացիստական հանցագործություններին ատամնաբույժների մասնակցությանը, բացահայտել են, որ նրանք ներգրավված են եղել համակենտրոնացման ճամբարների դիակներից ոսկե պսակների և լցոնների հեռացման գործընթացում՝ մետաղը վերօգտագործելու կամ վերահալելու նպատակով։ Շատ ատամնաբույժներ մասնակցել են նաև բանտարկյալների ընտրությանը, որոնք ուղարկվել են մահվան կամ հարկադիր աշխատանքի։

Հետազոտություններով պարզվել է, որ ստոմատոլոգիական ֆակուլտետների դասախոսների ավելի քան վաթսուն տոկոսը և բոլոր ատամնաբույժների հիսունհինգ տոկոսը եղե՛լ են Ազգային սոցիալիստական գերմանական աշխատավորական կուսակցության անդամներ՝ ինչը զգալիորեն ավելի բարձր ցուցանիշ է, քան մյուս մասնագիտությունների մեջ։

Արարողության ընթացքում շնորհվեց Հանս Թյուրքհայմի անվան առաջին մրցանակը։ Այս հրեա ատամնաբույժը ստիպված եղավ փախչել նացիստական Գերմանիայից։

Միջոցառման կազմակերպիչները հայտնել են, որ այս խնդրի ճանաչումը հետաձգվել է, քանի որ ատամնաբուժությունը երկար ժամանակ համարվել է որպես «երկրորդական» ոլորտ, իսկ հետպատերազմյան սերունդը ցուցաբերել է չափազանց շատ հարգանք իրենց ուսուցիչների և մենթորների նկատմամբ՝ ինչը խոչընդոտել է անցյալին նայելուն՝ առանց խտրականության։