**Հրդեհ Արմավիրի մարզի Գետաշեն գյուղում. 85-ամյան տեղափոխվել է բժշկական կենտրոն**

Արմավիրի մարզի Գետաշեն բնակավայրում հունիսի 22-ին տեղի է ունեցել հրդեհ։ Ժամը 10:30-ին «911» ճգնաժամային կառավարման կենտրոնը ստացել է ահազանգ՝ մեկ հարկանի տնային հրդեհի մասին։

Ի պատասխան՝ Արմավիրի և Բաղրամյանի հրշեջ-փրկարարական ջոկատների մարտական հաշվարկներն անմիջապես ժամանել են դեպքի վայր։ Նրանց օգնության են հասել նաև Պարեկային ծառայության Արմավիրի մարզի գումարտակի աշխատակիցները՝ վաշտի հրամանատար Մանուկ Սարգսյանի և դասակի հրամանատար Նարեկ Գրիգորյանի ղեկավարությամբ։

Տարածքը սահմանազատել են պարեկ Արա Գրիգորյանը և կրտսեր պարեկ Ալյոշա Հարությունյանը։ Բաղրամյանի համայնքային ոստիկանության հերթապահ խումբը նույնպես մասնակցել է միջադեպի լուծմանը։

Պարզվել է, որ հրդեհի հետևանքով տուժել է տան 85-ամյա բնակիչ Մամիխան Շ.-ն, որը այրվածքներով տեղափոխվել է «Արմավիր» բժշկական կենտրոն։

Դեպքի փաստով Բաղրամյանի ոստիկանության բաժնում փաստաթղթեր են կազմվում։ Ներկայումս պարզվում է հրդեհի պատճառը։ Հավանական է, որ քննությունը կտեղափոխվի Արմավիրի մարզային քննչական վարչություն։

**Ծանոթագրություն.** Ենթադրյալ հանցանքի մեջ կասկածվողը համարվում է անմեղ, քանի դեռ նրա մեղավորությունը չի ապացուցվել օրենքով հաստատված կարգով։