Հայաստանի պետական բյուջեն թվային տեքստ է, որն արտահայտում է երկրի իրականությունը՝ հաջողություններն ու ձախողումները, մարտահրավերներն ու հնարավորությունները։ Այս մասին հունիսի 4-ին Ազգային ժողովում 2024 թվականի պետական բյուջեի կատարման տարեկան հաշվետվության ներկայացման ընթացքում հայտարարեց ՀՀ վարչապետ Նիկոլ Փաշինյանը։

«Կարևոր է, որ կարողանանք բյուջեի թվերը թարգմանել բովանդակային տեքստի՝ հասկանալու, թե ինչ են դրանք իրականում նշանակում, և հետո կրկին արտահայտել թվերով», — նշեց վարչապետը։

Պետական եկամուտներն աճել են՝ գերազանցելով 2.5 տրիլիոն դրամը

Վարչապետի խոսքով, 2024 թվականին պետական բյուջեի եկամուտները կազմել են 2 տրիլիոն 579 միլիարդ 200 միլիոն դրամ։

«Սա նշանակում է, որ բոլորովս այսքան գումար ենք փոխանցել պետական բյուջե, որը մեր երկրի ընտանեկան բյուջեն է։ Այս թիվը մեր աշխատանքի արդյունքն է։ Մեր խնդիրը ոչ միայն այս թվերի աճն ապահովելն է, այլև մարդկանց գոհունակությունը բարձրացնելը։»

Աշխատավարձերի ֆոնդը 2018-ի համեմատ աճել է 2.5 անգամ

Փաշինյանը հատուկ ուշադրություն դարձրեց գրանցված աշխատողների աշխատավարձերի աճին․

• 2025 թվականի ապրիլին՝ համախառն աշխատավարձի ֆոնդը կազմել է 238 միլիարդ 975 միլիոն դրամ։
• Համեմատության համար՝ 2018 թվականի ապրիլին այն կազմել էր 94 միլիարդ 206 միլիոն դրամ։

«Այսինքն՝ գրանցված աշխատավարձային ֆոնդը 2.5 անգամ աճել է՝ ավելանալով մոտ 144 միլիարդ դրամով կամ 153 տոկոսով։ Սա տարբերություն է պետության և չպետության միջև», — ընդգծեց Փաշինյանը։

Վարչապետը նաև նշեց, որ այս ցուցանիշում հաշվի են առնվում թե բարձր աշխատավարձ ստացողները՝ 3–4 միլիոն և ավել, և թե ցածր աշխատավարձ ստացողները՝ 80,000 դրամ, ինչպես նաև կես կամ քառորդ դրույքով աշխատողներն ու նրանց եկամուտները։

Մրցունակ կրթությունը՝ բարձր աշխատավարձի հիմնական նախապայման

Փաշինյանը կարևոր հայտարարություն արեց՝ անդրադառնալով աշխատավարձերի ձևավորման պատճառներին․

«Բարձր աշխատավարձ հիմնականում՝ 80-90 տոկոսով, ստանում են նրանք, ովքեր մրցունակ կրթություն են ստացել։ Իսկ ցածր աշխատավարձ՝ նույն չափով, ստանում են նրանք, ովքեր մրցունակ կրթություն չեն ստացել։»

Վարչապետի այս ձևակերպումը, իր խոսքերով, կարող է «աղմկոտ» ընկալվել, սակայն նա ընդգծեց, որ այս դիտարկումը հիմնված է թվերի վրա։