Լեհաստանի վարչապետ Դոնալդ Տուսկը հայտնել է, որ Ուկրաինայի նախագահ Վլադիմիր Զելենսկին իրեն ասել է, որ Կիևը պատրաստ է շարունակել պայքարը Ռուսաստանի դեմ՝ առնվազն «հաջորդ երկու-երեք տարում»։

Տուսկը Բրիտանական The Sunday Times թերթին տված հարցազրույցում նշել է, որ քննարկումը տեղի է ունեցել հինգշաբթի Ուկրաինայում շարունակվող պատերազմի և Արևմտյան Եվրոպայի նկատմամբ ռուսաստանյան սպառնալիքի շուրջ։

«Չեմ կասկածում, որ Ուկրաինան կշարունակի որպես անկախ երկիր գոյություն ունենալ, – ասել է նա։ – Հիմա ամենակարևոր հարցն այն է, թե ինչքան զոհեր կունենանք։ Նախագահ Զելենսկին ինձ ասաց, որ հույս ունի, որ պատերազմը տասը տարի չի տևի, բայց Ուկրաինան պատրաստ է կռվել ևս երկու կամ երեք տարի»։

Լեհաստանի առաջնորդը զգուշացրել է, որ Ռուսաստանն ունի «դրամատիկ» երկարաժամկետ խնդիրներ, որոնք սրվել են ԱՄՆ-ի նոր պատժամիջոցների պատճառով, որոնք ուղղված են նրա նավթային ոլորտին, սակայն ընդգծել է, որ Մոսկվան դեռ ունի առավելություն մի կարևոր ոլորտում։

«Որքան էլ ռուսները լուրջ տնտեսական դժվարություններ ունենան, դրանք չեն նշանակում, որ հաղթանակ ենք տանում։ [Ռուսներն] ունեն մեկ կարևոր առավելություն Արևմուտքի, հատկապես Եվրոպայի նկատմամբ՝ նրանք պատրաստ են կռվել», – ասել է Տուսկը։

Նա անդրադարձել է Եվրոպայի արձագանքին՝ նշելով, որ «դառը բավարարվածություն» է զգում՝ նկատի ունենալով Մոսկվայի վարքի մասին տարիներ շարունակ արված նախազգուշացումները։

«Մենք խոսում ենք Եվրոպայում պատրանքների դարաշրջանի ավարտի մասին։ Վախենում եմ՝ սա արդեն շատ ուշ է՝ սպառնալիքներին պատշաճ պատրաստվելու համար, բայց դեռ ուշ չէ՝ գոյատևելու համար», – ասել է նա։