Սամվել Կարապետյանի իրավական թիմի անդամ Արամ Վարդևանյանին ուղղված հարցերի շրջանակում քննարկվել է գործարարի գործով վերաքննիչ բողոքի մակագրման հարցը։

– Պարոն Վարդևանյան, մամուլում հրապարակված տվյալներով՝ Սամվել Կարապետյանի գործով վերաքննիչ բողոքը մակագրվել է դատավոր Արմեն Դանիելյանին։ Ի՞նչ կարող եք ասել այդ մասին։

– Վերաքննիչ դատարանում բոլոր դատավորները, բացառությամբ Արմեն Դանիելյանի, ակնհայտորեն չէին կարող անփոփոխ թողնել Առաջին ատյանի դատարանի կալանքի որոշումը, որը իրավունքի հետ առնչություն չունի։ Հրապարակված տվյալներով՝ բողոքը մակագրվել է հենց նրան։ Հիշեցնեմ, որ Արմեն Դանիելյանը երկար տարիներ համարվել է ամենացածր վարկանիշ ունեցող դատավորներից մեկը և հաճախ է ենթարկվել քննադատության։ Նրա նկատմամբ հասարակության վստահությունը չափազանց ցածր է, և նրանից ոչ ոք երբեք արդարադատություն չի ակնկալել։

Ուշագրավ է, որ նրա անունը կարող էր բացակայել մակագրման համակարգի ցանկից, սակայն Սամվել Կարապետյանի գործով բողոքը հնարավոր է մակագրվել է հենց նրան։ Այս ամենը ցույց է տալիս, որ Առաջին ատյանի դատարանը աննախադեպ կարճ ժամկետում՝ 24 ժամից պակաս, հունիսի 20-ին գործի նյութերն ուղարկել է Վերաքննիչ դատարան։ Նման դեպքեր նախկինում չեն եղել, ինչը հարցեր է հարուցում արդարադատության գործընթացի վերաբերյալ։

– Ի՞նչ գործողություններ եք նախատեսում, եթե հաստատվի, որ բողոքն իսկապես մակագրվել է Արմեն Դանիելյանին։

– Մենք արդեն նշել ենք, որ Սամվել Կարապետյանի նկատմամբ հետապնդումը իրավունքից զուրկ է, իսկ կալանքը՝ ապօրինի։ Եթե հաստատվի, որ բողոքը մակագրվել է Արմեն Դանիելյանին, դա կհաստատի քաղաքական հետապնդման առկայությունը։ Քանի որ պաշտոնական հաստատում դեռ չկա, այս հարցին կանդրադառնանք առաջիկա օրերին։