Արդի պայմաններում մենք պետք է վերանայենք մեր մոտեցումները և բառապաշարը, քանի որ ամբողջ համակարգը փոխվել է: Այս մասին այսօր՝ հոկտեմբերի 23-ին, կառավարության նիստի ժամանակ նշեց Նիկոլ Փաշինյանը՝ անդրադառնալով հաշմանդամության հարցերին:

«Հիմա մենք խոսում ենք անձի ֆունկցիոնալության գնահատման մասին: Համակարգը կենտրոնացած չէ միայն մարդու առողջական վիճակի վրա, քանի որ 21-րդ դարում, հատկապես 40 տարեկանից հետո, համարյա անհնար է գտնել մեկին, որը լրիվ առողջ լինի: Պետք է գնահատենք այն, թե ինչ ֆունկցիաներ մարդը չի կարողանում կատարել: Եթե կանխատեսենք, որ մարդը օրինակ 2-3 տարի առաջ բուժվել է քաղցկեղից, ապա պետք է գնահատել նրա ֆունկցիոնալությունը: Ֆունկցիոնալությունը նշանակում է, թե մարդը ի վիճակի է լիարժեք կենսագործունեության համար անհրաժեշտ գործողությունները կատարել, կամ ինչ սահմանափակումներով կարող է դա անել: Սա է գնահատվում, ոչ թե մարդու առողջական վիճակը, ինչպիսին այն կա հիմա:

Մենք նախաձեռնել ենք անձի ֆունկցիոնալության գնահատման համակարգ, որը հիմնված է աշխարհի առաջատար փորձի վրա: Մենք նորից բան չենք հորինել, այլ միավորել ենք մեր պրակտիկաները աշխարհի լավագույն, առաջադեմ փորձին համապատասխան: Մեր նպատակն է ապահովել մարդուն ամբողջական աջակցություն՝ այնպես կազմակերպելով, որ նա իր աշխատանքով, կրթությամբ և կարիքներ հոգալով հնարավորինս արդյունավետ լինի», — նշեց Փաշինյանը:

Փաշինյանը անդրադարձավ նաև երեխաների համար շաքարային դիաբետի կառավարման համակարգի ներդրմանը, որը պատրաստվում է ապահովել լիարժեք և ճշգրիտ տվյալներ՝ առանց երեխաների մատը ծակելու: «Այս որոշմամբ պետությունը գնում է այդ սարքերը, որոնք տեղադրվում են երեխայի ձեռքին և կապվում սմարթֆոնին: Ծնողները կարող են օրվա ցանկացած պահին հետևել տվյալներին, որը ցույց է տալիս դինամիկան: Այդպիսով, մենք լուծում ենք այս խնդիրը», — ասաց Փաշինյանը: