Ստամբուլ, հունիսի 22։ Իրանի արտաքին գործերի նախարար Աբաս Արաղչին հայտարարել է, որ իսլամական հանրապետությունը կշարունակի պաշտպանել իրեն բոլոր հնարավոր միջոցներով՝ ի պատասխան ԱՄՆ-ի հարվածների իրանական միջուկային օբյեկտներին։

«Իրան կտրականապես դատապարտում է այս գործողությունը։ Անտեսված են ՄԱԿ-ի հիմնարար սկզբունքները։ Գործադրվել է հարված ՄԱԿ-ի անդամ պետության տարածքային ամբողջականության դեմ՝ այս ամենը կատարվել է ցեղասպանություն իրականացնող ռեժիմի հետ համատեղ։ Մենք կշարունակենք պաշտպանել մեզ բոլոր հնարավոր միջոցներով։ Մենք կպաշտպանենք Իրանը ոչ միայն ԱՄՆ-ի ռազմական ագրեսիայից, այլև Իսրայելի ագրեսիայից», — հայտարարել է Արաղչին Ստամբուլում անցկացված մամուլի ասուլիսում։

ԱՄՆ-ն կիրակի գիշերը հարվածել է Իրանի երեք միջուկային օբյեկտներին՝ Նատանզում, Ֆորդոյում և Իսֆահանում։ ԱՄՆ նախագահ Դոնալդ Թրամփի խոսքով, հարվածի նպատակը երկրի միջուկային հնարավորությունների սահմանափակումն էր։ Նա հայտարարել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում։

Թեհրանը պահանջել է Ատոմային էներգիայի միջազգային գործակալության (ՄԱԳԱՏԵ) և ՄԱԿ-ի Անվտանգության խորհրդի արտահերթ նիստ հրավիրել։ Իրանի խորհրդարանում հայտարարել են, որ Թեհրանը սպասում էր Ֆորդոյի միջուկային օբյեկտի վրա հարձակմանը, ուստի իրականացրել է տարհանում, և օբյեկտը անդառնալի վնաս չի կրել։

Երկրի ատոմային էներգիայի կազմակերպությունը ընդգծել է, որ Թեհրանը չի պատրաստվում դադարեցնել միջուկային ոլորտի զարգացումը հարվածներից հետո։ Իրանի միջուկային անվտանգության կենտրոնը հայտնել է, որ ԱՄՆ-ի հարձակման ենթարկված միջուկային օբյեկտներում ռադիոակտիվ նյութերի արտահոսք չի գրանցվել։

ՄԱԳԱՏԵ-ն նշել է, որ առայժմ չի գրանցել միջուկային օբյեկտների սահմաններից դուրս ճառագայթման մակարդակի բարձրացում, սակայն չի բացառել, որ դրանց ներսում ռադիոակտիվ և քիմիական աղտոտում կարող է լինել։

Այս հարվածը արդեն բացասական արձագանք է առաջացրել և՛ միջազգային, և՛ ԱՄՆ-ի ներսում։ ՄԱԿ-ի գլխավոր քարտուղար Անտոնիու Գուտերեշը այն անվանել է տարածաշրջանում վտանգավոր էսկալացիա և միջազգային խաղաղության ու անվտանգության ուղղակի սպառնալիք։

ԱՄՆ-ի հանրապետական կոնգրեսական Թոմաս Մասսին Իրանի վրա հարվածները անվանել է ԱՄՆ սահմանադրությանը հակասող, իսկ դեմոկրատ կոնգրեսական Ալեքսանդրիա Օկասիո-Կորտեսը հայտարարել է, որ տեղի ունեցածը կարող է դառնալ Թրամփի դեմ մեղադրանքների հիմք։