ՍՏԱՄԲՈՒԼ, հունիսի 22. Իրանի արտաքին գործերի նախարար Աբաս Արաքչին հայտարարել է, որ ներկայումս չունի տվյալներ ԱՄՆ-ի հարվածներից Իրանի միջուկային օբյեկտներին հասցված վնասի մասին: «Ես կապվել եմ Իրանի հետ: Առայժմ ճշգրիտ տվյալներ չկան վնասի մասշտաբների վերաբերյալ: Բայց կարծում եմ, որ դա հիմնականը չէ: Խոսքը երկրի վրա հարձակման մասին է, ինչը պետք է դատապարտվի», — ասել է Արաքչին Ստամբուլում մամուլի ասուլիսի ժամանակ:

ԱՄՆ-ն կիրակի գիշերը հարվածներ է հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում: Ամերիկայի նախագահ Դոնալդ Թրամփի խոսքերով՝ հարվածների նպատակն էր սահմանափակել երկրի միջուկային հնարավորությունները: Նա նշել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում:

Իրանի խորհրդարանում հայտնել են, որ Թեհրանը սպասում էր Ֆորդոյի միջուկային օբյեկտի վրա հարձակմանը, ինչի պատճառով իրականացրել է տարհանում, և օբյեկտին անդառնալի վնաս չի հասցվել:

Երկրի ատոմային էներգիայի կազմակերպությունում ընդգծել են, որ Թեհրանը չի պատրաստվում դադարեցնել միջուկային ոլորտի զարգացումը հարվածներից հետո:

ԱՄՆ-ի հարձակումն արդեն բացասական արձագանք է առաջացրել միջազգային ասպարեզում: ՄԱԿ-ի գլխավոր քարտուղար Անտոնիու Գուտերեշը դա անվանել է տարածաշրջանում վտանգավոր սրման և միջազգային խաղաղության ու անվտանգության ուղղակի սպառնալիք:

Կուբայի արտաքին գործերի նախարար Բրունո Ռոդրիգես Պարիլյան դատապարտել է ԱՄՆ-ի ագրեսիան Իրանի դեմ՝ այն անվանելով քրեական անպատասխանատու գործողություն, որը խախտում է միջազգային իրավունքի նորմերը և կարող է հանգեցնել անկանխատեսելի հետևանքների:

ԱՄՆ-ի հանրապետական կոնգրեսմեն Թոմաս Մասին Իրանին հասցված հարվածները անվանել է սահմանադրությանը հակասող, իսկ Նյու Յորք նահանգից դեմոկրատ կոնգրեսական Ալեքսանդրիա Օկասիո-Կորտեսը հայտարարել է, որ տեղի ունեցածը հիմք է նախագահին իմպիչմենտի ենթարկելու համար: