Հայաստանի Հանրապետության գլխավոր դատախազ Աննա Վարդապետյանը հոկտեմբերի 3-ին ընդունել է Ռուսաստանի Դաշնության գլխավոր դատախազի տեղակալ Պյոտր Գորոդովի գլխավորած պատվիրակությանը:

Պատվիրակությունը Հայաստան էր ժամանել՝ մասնակցելու Երևանում կայացած Կոռուպցիայի հակազդման միջպետական խորհրդի 10-րդ նիստին:

Աննա Վարդապետյանը ողջունել է ՌԴ գործընկերոջը ՀՀ գլխավոր դատախազությունում՝ կարևորելով երկու երկրների իրավապահ կառույցների համագործակցության մակարդակը:

«Վստահ եմ, որ այսօր ընդունված որոշումները կնպաստեն Խորհրդի շրջանակներում համատեղ աշխատանքների արդյունավետության բարձրացմանը։ ԱՊՀ անդամ պետությունները կոռուպցիան ճանաչել են որպես սպառնալիք և համատեղ ջանքերով ձգտում են պայքարել դրա դեմ»,- ընդգծել է Ա. Վարդապետյանը:

Ռուսաստանի Դաշնության գլխավոր դատախազի տեղակալ Պյոտր Գորոդովը շնորհակալություն է հայտնել Աննա Վարդապետյանին հյուրընկալության համար՝ շնորհավորելով Խորհրդի հոբելյանական նիստը բարձր մակարդակով կազմակերպելու կապակցությամբ: Նա մաղթել է Ա. Վարդապետյանին հաջողություն՝ միջպետական խորհրդի նախագահությունը ստանձնելու պատճառով:

Հանդիպման ժամանակ քննարկվել են երկկողմանի հետաքրքրություն ներկայացնող մի շարք հարցեր:

Кոռուպցիայի հակազդման միջպետական խորհրդը ստեղծվել է ԱՊՀ անդամ պետությունների ղեկավարների կողմից՝ 2013 թվականին։ Խորհուրդը ներառում է Հայաստանի, Ռուսաստանի, Բելառուսի, Ղրղզստանի գլխավոր դատախազներին, Ղազախստանի Ազգային անվտանգության կոմիտեն, Ուզբեկստանի ու Տաջիկստանի կոռուպցիայի դեմ պայքարի համապատասխան ղեկավարներին: