Հայաստանի Հանրապետության կրթության, գիտության, մշակույթի և սպորտի նախարար Ժաննա Անդրեասյանը հանդիպել է Գերմանիայի Հալլե-Վիթենբերգի Մարտին Լյութերի անվան համալսարանի (MLU) ռեկտոր Կլաուդիա Բեքերի գլխավորած պատվիրակության հետ։ Այս մասին տեղեկացնում են ԿԳՄՍ նախարարությունից։

Հանդիպմանը մասնակցել է նաև ԿԳՄՍ նախարարի տեղակալ Արթուր Մարտիրոսյանը։

Ռեկտորին ողջունելով՝ Ժաննա Անդրեասյանը նշել է, որ համագործակցության զարգացումը Հայաստանի գիտակրթական հաստատությունների և Հալլե-Վիթենբերգի համալսարանի միջև կարևոր նշանակություն ունի։ «Այս համագործակցությունը կրթության ոլորտում նոր հնարավորությունների ստեղծման և գիտական ներուժի ամրապնդման արտացոլում է։ Այն կարող է նպաստել երկարաժամկետ ու հեռանկարային նախագծերի իրագործմանը՝ դարձածելով երկուստեք արդյունավետ»,- ընդգծել է նախարարը։

Նախարարը հատկապես կարևորել է «Ակադեմիական քաղաք» ծրագիրը՝ ներկայացնելով գերմանական ընկերությունների ուղեցույցի դերը։ Նա ընդգծել է, որ նախագծի գլխավոր հատակագիծը մշակվում է գերմանական GMP International GmbH Architects and Engineers ընկերության կողմից, իսկ տեխնոլոգիաների և նորարարությունների մոդելը՝ Մյունխենի տեխնոլոգիական համալսարանի (TUM) և «Մյունխենի տեխնիկական համալսարան-միջազգային» (TUMint) կազմակերպության մասնակցությամբ։ Կողմերը քննարկել են նաև ակադեմիական քաղաքում նորաստեղծ համալսարանների և Գերմանիայի առաջատար համալսարանների համագործակցության հնարավորությունները, ինչպես նաև Եվրամիության աջակցությամբ համատեղ ծրագրերի մասնակցությունը, այդ թվում՝ Erasmus+, Horizon Europe, DAAD ծրագրերին։ Մտքեր են փոխանակվել նաև «Մատենադարան» Մ. Մաշտոցի անվան հիմնարկի հետ համագործակցության և գիտահետազոտական ծրագրերի իրագործման վերաբերյալ:

Կլաուդիա Բեքերը շնորհակալություն է հայտնել ընդունելության համար և նշել, որ Հալլե-Վիթենբերգի Մարտին Լյութերի անվան համալսարանն ակնածանքով է մոտենում Հայաստանի հետ համատեղ կրթական և հետազոտական ծրագրեր իրականացնելու հնարավորություններին։

Հանդիպման ընթացքում քննարկվել են նաև այլ փոխադարձ հետաքրքրություն ներկայացնող հարցեր։