Երեք անչափահասներ վրաերթի ենթարկվել են Երևանի Հրազդանի կիրճում

Այսօր, հունիսի 21-ին, ժամը 16:30-ի սահմաններում Հրազդանի կիրճում «Nissan» ավտոմեքենան վրաերթի է ենթարկել 3 անչափահաս հետիոտնի:

Ավտովթարի հիմնական մանրամասները

Վարորդը փախուստի չի դիմել և անմիջապես ահազանգել է շտապօգնության ծառայություն: Օպերատիվորեն ժամանած Երևանի 1-03 շտապօգնության բժիշկների խումբը տեղում երեխաներին առաջին բուժօգնությունն է ցուցաբերել:

Անչափահասները տեղափոխվել են «Սուրբ Աստվածամայր» բժշկական կենտրոն, որտեղ բժիշկներն ի վիճակի են եղել նրանց շոկային վիճակից դուրս բերել և փրկել նրանց կյանքը:

Ոստիկանական հետաքննություն

Դեպքի վայր են ժամանել ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկները:

Տարածքը սահմանազատվել է պարեկ Արեն Հարությունյանի և Սուրեն Հովակիմյանի կողմից:

Դեպքի մասին տեղեկությունը փոխանցվել է ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժին: Վայր է ժամանել քննչական խումբը:

Քննության արդյունքները

Վարորդը տեղում ենթարկվել է սթափության փորձքննության և եղել է սթափ:

Քննիչի հանձնարարականով ավտոմեքենան տեղափոխվել է ՊԾ Երևան քաղաքի գնդի պահպանավող տարածք:

Հիվանդանոց տեղափոխված երեխներն են. 14-ամյա Համլետ Ն.-ն, 16-ամյա Ալեքս Ս.-ն և 14-ամյա Գագիկ Մ.-ն:

Ծանուցում

Ենթադրյալ հանցանքի մեջ կասկածվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի օրինական ուժի մեջ մտած դատավճռով: