Իսրայելի արտաքին գործերի նախարար Գիդեոն Սաարն այս կիրակի հայտարարեց, որ Պաղեստինի պետականության ճանաչմանն ուղղված միջազգային ջանքերը սխալ են։ Նա նախազգուշացրեց, որ դա կարող է հանգեցնել «միակողմանի պատասխանի»։

«Եվրոպական երկրները, ինչպիսիք են Ֆրանսիան ու Մեծ Բրիտանիան, որոնք պնդում են ճանաչման վրա, լուրջ սխալ են գործում»,-նշեց Սաարը իր դանիացի գործընկեր Լարս Լյոկկե Ռասմուսենի հետ համատեղ մամուլի ասուլիսում։

Նրա խոսքով, նման ծրագրերը կարող են խոչընդոտել խաղաղությանը հասնելուն և վտանգել տարածաշրջանի կայունությունը։ Նա նաև ակնարկել է, որ Իսրայելը կարող է գնալ միակողմանի քայլերի։

Նախկինում Իսրայելի կառավարությունը հաստատել է Արևմտյան ափում նոր բնակավայրերի ստեղծումը, ներառյալ՝ E1 նախագիծը Երուսաղեմի արևելքում։ Միջազգային հանրության կարծիքով՝ այս նախագծերը սպառնում են ապագա Պաղեստինյան պետության կենսունակությանը։ Միջազգային իրավունքը Իսրայելի բնակավայրերը օկուպացված տարածքներում անօրինական է համարում։ Ֆինանսների նախարար Բեցալել Սմոտրիչը հայտարարել է, որ E1 նախագիծը միտված է «թաղել պաղեստինյան պետության գաղափարը»։

Ֆրանսիան և Մեծ Բրիտանիան, այս ամսվա ընթացքում ՄԱԿ-ում ընթացող 80-րդ նստաշրջանի շրջանակներում, հայտնել են Պաղեստինի պետությունը ճանաչելու իրենց ցանկության մասին։

Ֆրանս-իսրայելական հարաբերությունները լարված են, հատկապես այն բանից հետո, երբ Ֆրանսիայի նախագահ Էմանուել Մակրոնը հայտարարել է իր երկրի ծրագրերի մասին և հուլիսին ՄԱԿ-ում Սաուդյան Արաբիայի հետ համատեղ անցկացրել է կոնֆերանս՝ ուղղված երկու պետությունների գոյությանը։

Մեծ Բրիտանիայի վարչապետ Քիր Ստարմերը նախորդ ամսվա ընթացքում հայտարարեց, որ իր երկիրը կհետեւի այդ օրինակին և կճանաչի Պաղեստինի պետությունը, եթե Իսրայելը չհամաձայնի հրադադարի Գազայի պատերազմում, որն սկսվել է ՀԱՄԱՍ-ի հարձակման հետևանքով 2023 թվականի հոկտեմբերին։