Հետազոտողների խումբը ներկայումս զբաղված է ջրի տակ գտնված հին քաղաքի մնացորդների որոնմամբ, որը հանդիսացել է կարևոր առևտրային նավահանգիստ մ.թ.ա. 4-րդ դարից մինչև մ.թ. 3-րդ դարը։ Գիտնականները Միջերկրական ծովի հատակի ուսումնասիրության միջոցով հույս ունեն հայտնաբերել արտեֆակտներ, որոնք լուսաբանելու են Տիպասայի պատմական դերը։

Նախագծի երկրորդ փուլը, ՅՈՒՆԵՍԿO-ի առաջարկությունների համաձայն, արդեն մեկնարկել է։ ՅՈՒՆԵՍԿO-ի ներկայացուցիչները կոչ են արել Ալժիրին ընդլայնել հնագիտական վայրի պաշտպանական գոտին՝ կանխելու դրա վնասումը։ Հետազոտական խումբը ներառում է ջրասուզորդներ, ծովային հնագետներ և մասնագետներ Ազգային ծովային թանգարանից, Մշակութային արժեքների պաշտպանության ազգային կառույցից և Բու Իսմայիլի ծովային հետազոտությունների կենտրոնից։

Գիտնականները ծրագրում են դուրս բերել նախորդ տարվա ապրիլին առաջին արշավախմբի ընթացքում հայտնաբերված արտեֆակտները և շարունակել Միջերկրական ծովի հատակի ուսումնասիրությունները։ Հնագետների խոսքով, այժմյան աշխատանքներն ակնկալվում է, որ կտևեն մինչև սեպտեմբեր։

Հիմնական նպատակներից է ստուգել այն տեսությունը, որ ալիքների տակ կա հին քաղաք։ Հետազոտողները նաև ուսումնասիրում են նախահռոմեական փյունիկյան նավահանգստի հնարավոր մնացորդները։

Նախորդ արշավախմբի ընթացքում հայտնաբերվել են ամֆորաներ, քարե կառույցներ և ժայռափոր կառույցներ։ Այս գտածոները, ըստ գիտնականների, վկայում են մ.թ.ա. 4-րդ դարից մինչև մ.թ. 3-րդ դար տևած առևտրային գործունեության մասին։

«Ցիստեռնների, պահեստների և ժայռափոր նավամատույցի առկայությունը հաստատում են, որ դինամիկ հին նավահանգիստ գոյություն է ունեցել», — նշել է հետազոտող Ռաֆիկ Խելաֆը։

Այնուամենայնիվ, գիտնականները հավելել են, որ միայն հետագա սուզմունքներ և գիտական վերլուծություններ կարող են հաստատել հայտնաբերված նյութերի իրական բնույթը։

Տիպասան համարվում է Հյուսիսային Աֆրիկայի ամենաակնառու հնագիտական վայրերից մեկը։ Ափամերձ քաղաքը մեծ զարգացում է տեսել որպես մշակութային փոխանակման և առևտրային կենտրոն, ինչպես վկայում են նախկինում հայտնաբերված գտածոները։ Պահպանված հուշարձանները, ինչպիսիք են բազիլիկաները, թատրոնները, լոգարանները, դամբարանները և խճանկարները, արտացոլում են քաղաքի բարեկեցությունը։