Երևանում սկսվել է ՀՀ կրթության, գիտության, մշակույթի և սպորտի նախարարության կազմակերպած Գրքի երևանյան 8-րդ միջազգային փառատոնը։ Այս միջոցառումը անց է կացվում Հայաստանի պատմության թանգարանում և Հայաստանի ազգային պատկերասրահում, որտեղ սեպտեմբերի 5-7-ը տեղի կունենա գրքի տոնավաճառը՝ շենքի կամարաշարում:

Փառատոնի պաշտոնական բացմանը ներկա էին Երևանի քաղաքապետ Տիգրան Ավինյանը, ԿԳՄՍ նախարարի տեղակալ Դանիել Դանիելյանը, ինչպես նաև այլ պաշտոնատար անձինք և գրքասերներ։ Նրանք շրջել են տաղավարներով, ծանոթացել հրատարակչությունների աշխատանքին և ներկայացված գրքերի ցուցադրությանը, զրուցել հրատարակիչների ու ընթերցասերների հետ:

Գրքի տոնավաճառին իրենց մասնակցությունն են ապահովել 50-ից ավելի հրատարակչություններ, գրավաճառներ, թանգարաններ, գրադարաններ և կրթամշակութային հաստատություններ՝ առաջարկելով իրենց արտադրանքը 20-50 % զեղչերով։

Փառատոնի ընթացքում նախատեսվում է կազմակերպել 50 տարբեր միջոցառումներ, որոնց թվում են գրքերի շնորհանդեսներ, պոեզիայի ընթերցումներ, գրական հանդիպումներ, մասնագիտական քննարկումներ, վարպետության դասեր և գրական մրցանակաբաշխություն։ Այս միջոցառումներին կմասնակցեն հայտնի գրողներ, գրաքննադատներ և հրատարակիչներ Հայաստանից ու տարբեր երկրներից՝ ինչպես Միացյալ Թագավորությունից, Իտալիայից, Լատվիայից, Վրաստանից, Ռուսաստանից, Չեխիայից, Հունաստանից, Նիդերլանդներից, Իրանից, այնպես էլ Միացյալ Նահանգներից:

Նշենք, որ այս տարի փառատոնը կանցկացվի նաև Հայաստանի մարզերում՝ սեպտեմբերի 28-ին՝ Գյումրիում և հոկտեմբերի 4-ին՝ Կապանում: