Սյունիքի Տեղ գյուղի Հակոբյանների հյուրընկալ տան պատշգամբում տանտիրուհին վայելքով պատրաստում է սեղանը: Կենտրոնում՝ համեղ սաթագույն մեղրն է, որը ստացվել է իրենց մեղվափեթակներից, ինչպես նաև գյուղական հացն ու թարմ կարագ:

Հակոբյան ընտանիքը թողել է իրենց տունն ու ողջ ունեցվածքը Արցախում, որը 2023 թվականի սեպտեմբերին անցել է Ադրբեջանի վերահսկողության տակ, և տեղափոխվել են Տեղ: Նրանք մասնակցում են Երևանի պատվիրակության ու «Հիմնատավուշ» կազմակերպության համագործակցության ծրագրին, որը Կարմիր խաչի միջազգային կոմիտեի աջակցությամբ օգնում է Սյունիքում հաստատված արցախցիներին հիմնել իրենց սեփական մեղվաբուծարանները:

Ծրագիրը մեկնարկել է այս տարվա մայիսին, և դրա շահառու է դարձել 50 ընտանիք։ Յուրաքանչյուրին տրամադրվել է 4 մեղվափեթակ, մեղվաընտանիքներ, գործիքներ և պաշտպանիչ հագուստ։ Բացի այդ, կազմակերպվել են մեղվաբուծության դասընթացներ մասնակիցների համար։ Այս նախաձեռնության ընդհանուր արժեքը կազմել է 7,190,000 դրամ:

Ընտանիքի ղեկավարը լրագրողներին պատմել է, թե ինչպես ավելի քան 20 տարի զբաղվում է մեղվաբուծությամբ, մինչև որ ստիպված է եղել թողնել Արցախում իր ունեցած շուրջ հիսուն փեթակները:

«Մեղուները այնպիսի կենդանիներ են, որոնց մասին կարելի է ուսումնասիրել ամբողջ կյանքում ու միշտ հիանալ», – նշում է Արազիկ Հակոբյանը։

Հակոբյանների անսահման աշխատասիրության շնորհիվ մեղվաբուծարանը շարունակում է ընդլայնվել, և մեղրի իրականացման որևէ խնդիր չեն ակնկալում: