Չինաստանի նախագահ Սի Ծինփինը հայտարարեց, որ Չինաստանը միշտ կլինի ՄԱԿ-ի վստահելի գործընկերը։ Այս հայտարարությունը նա արեց շաբաթ օրը Տյանցզինում՝ ՄԱԿ-ի գլխավոր քարտուղար Անտոնիու Գուտերեշի հետ հանդիպման ժամանակ, տեղեկացնում է «Սինհուա» գործակալությունը:

Սի Ծինփինը շեշտում է, որ Չինաստանը պատրաստ է խորացնել համագործակցությունը ՄԱԿ-ի հետ, աջակցել կազմակերպության կենտրոնական դերին միջազգային հարաբերությունների մեջ և նպաստել համաշխարհային խաղաղության պահպանման, զարգացման և բարգավաճման։ Գուտերեշը ժամանել էր Տյանցզին՝ մասնակցելու Շանհայի համագործակցության կազմակերպության 2025 թվականի գագաթնաժողովին:

Նախագահը հիշեցնում է, որ այս տարի նշվում են Հակաֆաշիստական պատերազմի հաղթանակի և ՄԱԿ-ի հիմնադրման 80-ամյակը՝ ընդգծելով, որ բազմակողմանիությունը, համերաշխությունն ու համագործակցությունը ճիշտ պատասխան են գլոբալ մարտահրավերներին:

Սի Ծինփինը կոչ է անում վերականգնել ՄԱԿ-ի հեղինակությունն ու կենսունակությունը, որպեսզի ՄԱԿ-ը շարունակի ծառայել որպես հիմնական հարթակ՝ երկրների գործողությունների համակարգման համար։ Ըստ նրա, այսօր աշխարհը անցնում է վերջին հարյուր տարվա ընթացքում աննախադեպ փոփոխությունների, և Չինաստանը ապահովում է կայունություն՝ շարունակելով առաջարկել նոր հնարավորություններ:

Անտոնիու Գուտերեշը ընդգծում է, որ ներկայումս բազմակողմանիությունը, միջազգային իրավունքը և ՄԱԿ-ի հեղինակությունը լուրջ մարտահրավերների առջև են, և միջազգային կառավարման համակարգը կարիք ունի բարեփոխումների։ Նա կարևորում է ՄԱԿ-ի հիմնադրման սկզբնական արժեքներին և ձգտումներին վերադառնալու անհրաժեշտությունը:

Գուտերեշը Չինաստանը համարում է բազմակողմանիության պաշտպանության հիմնասյուն և նշում, որ ՄԱԿ-ը պատրաստ է ամրապնդել համագործակցությունը ՉԺՀ-ի հետ՝ նպաստելու աշխարհի բազմաբևեռությանը, զարգացող երկրների ներկայացվածության ընդլայնմանը և ՄԱԿ-ի դերի ուժեղացմանը միջազգային հարաբերություններում:

Հանդիպմանը մասնակցել են նաև բարձր պաշտոնյաներ՝ այդ թվում՝ Ցայ Ցին, Վան Ին և Չեն Մինյերը: