Իտալիայի վարչապետ Ջորջյա Մելոնին ու նրա քույրը՝ կուսակցության քաղաքական քարտուղար Արիաննան, ցնցված և վրդովված են այն բանից հետո, երբ իրենց լուսանկարները հայտնվել են Phica.eu կայքում՝ վիրավորական և սեքսիստական մեկնաբանություններով: Այս մասին հայտնում է Corriere della Sera-ն:

Մելոնին տեղի ունեցածը կանանց արժանապատվության կոպիտ վարկաբեկում է անվանել և ընդգծել, որ զիջումն այս պարագայում բացառված է։ Նա կանանց կոչ է արել ակտիվորեն արձագանքել և բողոքներ ներկայացնել՝ դա համարելով ինչպես իրավունք, այնպես էլ պարտականություն:

Արիաննա Մելոնին ենթադրում է, որ նմանատիպ դեպքերը ցույց են տալիս ներկայիս հասարակության դեգրադացիան, որտեղ անձնական սահմանները հաճախ անտեսվում են, և հրապարակային նվաստացումը դառնում է սովորական՝ չնայած կանանց բոլոր ձեռքբերումներին քաղաքական կյանքում և հասարակությունում:

Կրիտիկայի հեղեղից հետո Phica.eu հարթակի ադմինիստրատորները փակել են կայքը՝ խոստովանելով օգտատերերի վարքի վերահսկման անհամապատասխանություն:

Կիբերոստիկանությունը պարզել է կայքի ադմինիստրատորի ինքնությունը, որ իտալացի է, և գործի նյութերը փոխանցվել են Հռոմի դատախազությանը։ Կանայք ողջ Իտալիայով բողոքներ են ներկայացնում, ինչը կարող է հանգեցնել զրպարտության, հանցավոր բորբոքման և պետական մարմիններին վիրավորելու մեղադրանքների:

Կառավարությունը նաև մտադիր է հետևել նմանատիպ ռեսուրսներին, հրատարակիչների և իրավապահ մարմինների համագործակցությամբ միջոցառումներ մշակել։

Ընտանիքի հարցերով նախարար Էուջենիա Ռոչելլան նշել է, որ խնդրի էությունը կայանում է ինտերնետի ազատության և չարաշահումների կանխարգելման միջև հավասարակշռություն ապահովելու մեջ։ Իտալիայում հանրային արձագանքը գրեթե միաձայն է. կատարվածը համարվում է անձնական կյանքի անթույլատրելի ներխուժման և կանանց արժանապատվության կոպիտ վիրավորանքի օրինակ։