ԱՄՆ Պետքարտուղարությունը սեպտեմբերին Նյու Յորքում կայանալիք ՄԱԿ-ի Գլխավոր ասամբլեայի նստաշրջանից առաջ հրաժարվել է մուտքի թույլտվություններ տրամադրել Պաղեստինի ազատագրման կազմակերպության և Պաղեստինի ազգային ինքնավարության ներկայացուցիչներին, հայտնում է ТАСС-ը։

Արտգործնախարարության մամուլի ծառայության հայտարարության վկայմամբ՝ ԱՄՆ օրենսդրության համաձայն՝ պետքարտուղար Մարկո Ռուբիոն որոշել է չեղարկել և մերժել վիզաները, որոնք տրվել էին Պաղեստինի ազատագրման կազմակերպության և Պաղեստինի ազգային ինքնավարության անդամներին։

ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը հայտնել է, որ կազմակերպությունը մտադիր է քննարկել հարցը Պետքարտուղարության հետ՝ պաղեստինյան պատվիրակությանը վիզաներ տրամադրելու վերաբերյալ։ «Կարևոր է, որ բոլոր անդամ պետությունները և մշտական դիտորդները հնարավորություն ունենան մասնակցելու»,- ընդգծել է նա։

Դյուժարիկը հավելել է, որ պաղեստինյան պատվիրակության մասնակցությունը կարևոր է նաև երկու պետությունների լուծման վերաբերյալ մոտալուտ հանդիպմանը, որը կանցկացնեն Ֆրանսիան և Սաուդյան Արաբիան Գլխավոր ասամբլեայի նստաշրջանի սկզբում։ Այդ հանդիպումը հուլիսի վերջին Նյու Յորքում տեղի ունեցած միջազգային համաժողովի շարունակությունը կդառնա։