Հայաստանի կառավարության այսօրվա նիստում հաստատվեց Արարատ, Եղեգնաձոր և Մարտունի համայնքներում սիրողական սպորտի զարգացման ծրագիրը՝ մասնավորի հետ համագործակցությամբ:

Նախագծի ներկայացումը կատարեց Կրթության, գիտության, մշակույթի և սպորտի նախարար Ժաննա Անդրեասյանը:

Ծրագրի գլխավոր նպատակը պետական և մասնավոր ոլորտների միջև կայուն ու արդյունավետ համագործակցություն հիմնադրելն է սիրողական սպորտի ոլորտում՝ խթանելով զանգվածային սպորտի աճը, ֆիզիկական ակտիվության խրախուսում և առողջ ապրելակերպի զարգացում:

Կրթության, գիտության, մշակույթի և սպորտի նախարարությունից տեղեկացնում են, որ 2024-2030 թվականների ռազմավարական ծրագիրն ընդգրկում է յուրաքանչյուր խոշոր համայնքում տիպային մարզահամալիրների կառուցումը: Ժաննա Անդրեասյանը շեշտեց, որ այս համալիրները պետք է ներառեն խաղային մարզադահլիճներ, լողավազաններ տարբեր մարզաձևերի համար, ֆիտնես սրահներ, ինչպես նաև սրճարանային հատվածներ և անհրաժեշտ ենթակառուցվածքներ՝ նպաստելով ֆիզիկական առողջ ապրելակերպի տարածմանը և սպորտի զարգացմանը։

«Ֆիզիկական առողջ ապրելակերպի և սպորտի զարգացման համար անհրաժեշտ են համապատասխան ենթակառուցվածքներ, որոնք նպատակահարմար է զարգացնել մասնավորի հետ համատեղ՝ ներգրավելով տվյալ ոլորտում փորձ ունեցող կազմակերպություններին»,- ընդգծեց Անդրեասյանը՝ նշելով, որ ծրագրի քննարկման հրապարակային հրավերին արձագանքել է շուրջ 30 կազմակերպություն:

Համագործակցությունը կմեկնարկի «Հիլլզ» բրենդի ներքո մասնագիտացված ծառայություն իրականացնող կազմակերպության հետ:

Ժաննա Անդրեասյանը հայտնեց, որ մինչև 2025 թվականը ընկերությունը պարտավորվել է տրամադրել մարզահամալիրների նախագծանախահաշվային փաստաթղթեր, որոնք պատրաստվում են ընկերության միջոցներով և, փորձաշրջանից հետո, կդառնան հիմք մյուս վայրերում մարզահամալիրների կառուցման համար։ Արարատում նախատեսված է կառուցել համալիր՝ հիմք ընդունելով այս նախագիծը, որը հետագայում կմիացվի մյուս վայրերի համալիրներին։

Առաջին փուլում պետական բյուջեով նախատեսված միջոցներով իրականացվելու է շինարարական աշխատանքների, տեխնիկական և հեղինակային հսկողության գործընթաց՝ Արարատ, Եղեգնաձոր և Մարտունի համայնքներում: Արդյունքում, փուլի ավարտին, նորակառույցները կդառնան Հայաստանի Հանրապետության սեփականություն։

Երկրորդ փուլը նախատեսում է ընկերության կողմից միջազգային չափանիշներին համապատասխան սպորտային սարքավորումների ու գույքի ձեռքբերում և համալիրների ամբողջական կահավորում, որին մասնակցելու է նաև Հայաստանի պետությունը՝ փաստացի արժեքի 80 տոկոսը փոխհատուցելով պետական բյուջեից։

Երրորդ փուլում, մինչև 2027 թվականի ավարտը, նախաձեռնվում է կառուցված համալիրների հավատարմագրային կառավարումը 20 տարի ժամանակով:

«Այս նախագծով նշվում են նաև ընկերության և պետության պարտականությունները համալիրների շահագործման ընթացքում. ընկերությունը հոգալու է աշխատակիցների վարձատվությունը, շահագործման հարցերը, իսկ պետությունը մասնակից կլինի ֆինանսավորմանը՝ աջակցելով կոնկրետ խմբերին մարզաձևերով զբաղվելու գործում»,- նշեց մարզահամալիրների նախագիծը ներկայացնող նախարարը:

Նախարարի խոսքով՝ արդեն իսկ իրականացվում են համալիրների հողահատկացման աշխատանքները, ինչպիսիք Արարատում արդեն ավարտված են, իսկ Եղեգնաձորում և Մարտունիում՝ որոշված։

«Փորձնական համագործակցությունը թույլ կտա նաև մյուս համայնքներում նմանատիպ նախագծեր իրականացնել՝ համագործակցելով տարբեր կազմակերպությունների հետ»,- եզրափակեց Անդրեասյանը:

Վարչապետ Նիկոլ Փաշինյանը կարևորեց մարզային մարզահամալիրների ծրագիրը՝ նշելով, որ այն շրջադարձային է՝ բարձրացնելով մասնավորի հետ համագործակցության նշանակությունը և մրցունակությունը: